Hetaha 19-hadovaha mastaka z Hrodna zatrymlivali razam ź Cichanoŭskim. Što ź im ciapier?
Haradzienski 19-hadovy mastak Jarasłaŭ jeździć pa Biełarusi, Polščy i Litvie, dzie sustrakajecca ź biełaruskimi znakamitaściami, kab napisać ich partrety. Hety junak u 2020-m byŭ zatrymany razam ź Siarhiejem Cichanoŭskim, paśla čaho staŭ malavać na palityčnuju tematyku i rabić paštoŭki dla palitviaźniaŭ. «Naša Niva» pahutaryła z talenavitym chłopcam.
Jarasłaŭ maluje z kałyski, a cikavicca palitykaj pačaŭ z 15-16 hadoŭ. Mienavita palityčnaja situacyja ŭ krainie akazała niemały ŭpłyŭ na tvorčaść maładoha mastaka.
«Niahledziačy na toje, što ŭ 2020-m mnie jašče nie było 18, ja aktyŭna cikaviŭsia tym, što adbyvajecca. Kali daviedaŭsia, što ŭ Hrodna pryjazdžaje Siarhiej Cichanoŭski, to pajšoŭ pahladzieć na jaho vystup. Nijakich zaściaroh, što heta moža być niebiaśpiečna, u mianie navat nie ŭźnikała, bo heta było aficyjnaje mierapryjemstva», — zhadvaje chłopiec.
Adnak aficyjny charaktar mierapryjemstva nijak nie paŭpłyvaŭ na chod padziej. 29 maja na Savieckaj płoščy ŭ Hrodna byŭ zatrymany Siarhiej Cichanoŭski i jašče šerah ludziej. U ich liku akazaŭsia i Jarasłaŭ.
«Mahčyma, amapaŭcaŭ pryciahnuła majo jarkaje adzieńnie i najaŭnaść BČB-ściaha, — razvažaje naš surazmoŭca. — Naturalna, ja nie mieŭ nijakaha dačynieńnia da Cichanoŭskaha.
Na toj momant mnie było ŭsiaho 17 hadoŭ, tamu mianie pratrymali niadoŭha i ŭžo nočču adpuścili biez składańnia pratakoła. Supracoŭniki zabrali tolki moj telefon, abiacali, što viernuć, ale bolš svoj telefon ja tak i nie bačyŭ», — pryznajecca Jarasłaŭ.
Kali praź dzień na płoščy vystraiłasia vielizarnaja čarha haradžan, jakija chacieli pakinuć podpisy za vyłučencaŭ u kandydaty ŭ prezidenty, mastak znoŭ byŭ tam i vyrašyŭ namalavać čarhu z natury.
«Potym byŭ płakat ź Cichanoŭskim. Ja namalavaŭ Siarhieja na fonie taho samaha pikieta i dadaŭ nadpis «I'll be back». U apošni dzień zboru podpisaŭ ja pieradaŭ malunak štabu Śviatłany Cichanoŭskaj, a jašče praz tydzień jany sami sa mnoj źviazalisia. Štab prapanavaŭ zrabić sieryju paštovak salidarnaści z zatrymanymi ŭ Hrodnie ŭ toj dzień. Tady ja namalavaŭ dziesiać takich paštovak.
Paśla mnie prapanavali zrabić płakat z Paŭłam Sieviaryncam, my jaho adpravili žoncy Paŭła. Taksama byŭ płakat ź Mikałajem Statkievičam.
Da kalekcyi paštovak salidarnaści pastupova dadavalisia novyja hieroi. Byŭ tam i Vitold Ašurak, jaki na toj čas byŭ jašče žyvy», — zhadvaje chłopiec.
Junak kaža, što žadańnie tvaryć na papularnuju tady tematyku nie mieła pad saboj mety chajpanuť abo zarabić hrošaj. Naprykład, sa štaba Cichanoŭskaj Jarasłaŭ uziaŭ usiaho pa 5 rubloŭ za paštoŭku. Pa jaho słovach, heta prykładna taja suma, jakaja sychodzić na materyjały. Chłopiec adznačaje, što ŭsio rabiłasia ŭ pieršuju čarhu dziela idei.
U kalekcyi mastaka taksama byŭ trypcich z Maryjaj Kaleśnikavaj, Vieranikaj Capkała i Śviatłanaj Cichanoŭskaj. Padčas vystupu ŭ Hrodnie Śviatłana zaprasiła chłopca na scenu, dzie jon padaryŭ im hetuju svaju pracu.
Z časam Jarasłaŭ staŭ adychodzić ad palityčnych tem u svajoj tvorčaści, pakolki pracavać u hetym kirunku stanaviłasia ŭsio bolš niebiaśpiečna. Ale pačaŭ rabić partrety viadomych biełarusaŭ.
«Ja naviedvaŭ kursy «Mova Nanova», a tudy časta pryjazdžali roznyja znakamitaści, pakul jany hrali ci śpiavali, ja malavaŭ ich z natury. Potym padychodziŭ i braŭ aŭtohraf. Dziakujučy hetamu dośviedu ja zrazumieŭ, što mahu stasavacca z takimi ludzi, što ŭ hetym niama ničoha strašnaha, bo jany takija samyja ludzi, jak i ŭsie», — dzielicca Jarasłaŭ.
Pieršymi hierojami, kaho namalavaŭ chłopiec, byli Ihar Bancar i Źmicier Vajciuškievič. Jość u jaho partrety Alesia Dzianisava, Marharyty Laŭčuk, Mikity Bialeviča — ahułam 16 prac u kalekcyi. Usie ich chłopiec zachoŭvaje ŭ siabie, bo płanuje zrabić vystavu. A aŭtohrafy svaich hierojaŭ źbiraje na śpinie pracoŭnaha chałata.
«Paśla vystavy płanuju razdać partrety hierojam, abo ź ich dazvołu vystaŭlu karciny na prodaž. Vystavu chaču zrabić hetaj vosieńniu, ale pakul nie viedaju, u jakim horadzie. U mianie niama niejkaj vyznačanaj ličby, kolki na toj momant pavinna byť prac, ale jość prynamsi try asoby, čyje partrety ja chaču namalavać. Heta Lavon Volski, Śviatłana Cichanoŭskaja i Pavieł Łatuška», — kaža mastak.
Pieršapačatkova chłopiec rabiŭ partrety tolki tych asob, jakija znachodzilisia ŭ Biełarusi, a paśla adjezdu za miažu — i tych, chto žyvie ŭ Polščy i Litvie. Chłopiec pisaŭ u Varšavie, Biełastoku, Krakavie i Vilni.
«Kali ja pryjazdžaŭ u Vilniu, kab namalavać Marharytu Laŭčuk, to zrazumieŭ, što prosta abaviazany namalavać budynak, dzie znachodziłasia redakcyja «Našaj Nivy», — dzielicca mastak.
Ciapier užo bolš za miesiac Jarasłaŭ žyvie ŭ Polščy, dzie rychtujecca da pastupleńnia ŭ VNU. Ź Biełarusi chłopiec źjechaŭ praz toje, što pačałasia vajna.
«Niehledziačy na toje, što ja byŭ zatrymany ŭ adzin dzień ź Cichanoŭskim, malavaŭ na BČB-tematyku i nikoli nie chavaŭ svaju pazicyju, u dačynieńni da mianie nie było nijakich represij. U našym kaledžy mastactvaŭ nie adličvali praz palityčnyja pohlady. Tamu ź Biełarusi ja źjechaŭ mienavita praz pačatak vajny.
Ja zrabiŭ PŁR-test i, navat nie adličvajučysia z vučoby, prosta źjechaŭ. Nieviadoma, što mahło abycca, raptam zakryli b miežy i paźniej vyjechać užo było b niemahčyma», — razvažaje Jarasłaŭ.
U Polščy jon piša taksama pryhožyja krajavidy i staryja budynki. Jašče ŭ Hrodnie junak časta malavaŭ horad. Pryčym rabiŭ svaje zamaloŭki nie tolki na tradycyjnych materyjałach, ale i, naprykład, na doncach adnarazovych kubačkaŭ dla kavy.
Tvorčaść dazvalaje chłopcu nie tolki samarealizoŭvacca, ale i troški zarablać. Hetych hrošaj 19-hadovamu junaku chapaje na nabyćcio materjałaŭ, apłatu transpartu i na kišennyja vydatki.
«Naša Niva» adnaŭlaje zbor danataŭ — padtrymać prosta
Čytajcie taksama:
«Ja maru viarnucca nie prosta ŭ Biełaruś, a ŭ rodny Babrujsk». Tyktokier Mikita Bialevič pra adjezd, žonku i biełaruskamoŭny kantent
-
U Zasłaŭi nad ruinami bramy XVI stahodździa pabudujuć navies. Što viadoma pra ŭnikalny abjekt i čamu prapanavany prajekt — biessensoŭny i škodny
-
Na mohiłkach u Minsku źnieśli staryja kryžy i aharodžy. Zamiest ich staviać biezabličnyja bietonnyja padhałoŭniki
-
Da sarakavinaŭ pamiaci Śviatłany Kurs apublikavana raniej nie drukavanaje jaje ese «SSSR jak kałyska i mahiła»
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»34
Kamientary