Chadarkoŭski — Zachadu: Ci vy naniesiacie paražeńnie Pucinu na terytoryi Ukrainy, ci potym, ale ŭžo na terytoryi krain NATA
Pucin ź vialikaj vierahodnaściu prajhraje vajnu va Ukrainie, što ŭ dalejšym moža abiarnucca źmienaj režymu ŭ Rasii. Były kiraŭnik «Jukasa» Michaił Chadarkoŭski daŭ intervju «Bi-bi-si», u jakim raskazaŭ, jak mianiajecca staŭleńnie Zachadu da vajny va Ukrainie, jakim jon bačyć budučyniu Rasii i jak Pucin jaho padmanuŭ.
«Zachad uśviadomiŭ, pierad jakim vybaram jon staić»
U intervju BBC Michaił Chadarkoŭski raskazaŭ, što pazicyja Zachadu adnosna pieradačy patrebnaha ŭzbrajeńnia Ukrainie źmianiłasia. Što raniej zachodnija lidary ŭvieś čas spaźnialisia, «uvieś čas rabili toj krok, jaki treba było zrabić na miesiac raniej», ale situacyja pačała mianiacca.
«Heta majo adčuvańnie, što toje ŭzbrajeńnie, jakoje ciapier dajecca Ukrainie, — heta roŭna toje ŭzbrajeńnie, jakim mienavita ciapier Ukraina zdolnaja skarystacca. Bolš za toje, Zachad pačaŭ apieradžalna vučyć ukrainskich vajennych vykarystańniu taho novaha ŭzbrajeńnia, jakoje, moža być, ciapier nie pastupaje, ale budzie pastupać paźniej. Heta taksama vielmi pravilny i vielmi važny sihnał usim udzielnikam hetaha sutyknieńnia», — skazaŭ jon.
Na dumku Chadarkoŭskaha, «Zachad uśviadomiŭ, pierad jakim vybaram jon staić».
«Bazavaje, što ja kažu zachodnim lidaram: «Ruiny budynka — nie ŭ Maryupali, a ŭ jahonaj hałavie [Pucina], i jon pra heta havaryŭ šmat razoŭ, jon jakraz vajuje i z NATA, i Złučanymi Štatami, a zusim nie ź niejkaj tam Ukrainaj. I kali ŭ vašaj hałavie dla taho, kab Pucin zrabiŭ nastupny krok, pierajšoŭ miažu adnoj ź jeŭrapiejskich krain, Pucinu treba zrabić niejkija dadatkovyja namahańni, to ŭ jaho hałavie heta ŭžo adbyłosia, jon užo vajuje z NATA.
I vaš vybar zaklučajecca ŭ tym, naniesiacie vy paražeńnie Pucinu na terytoryi Ukrainy, ci potym vam daviadziecca nanosić hetuju parazu jamu, ale ŭžo na terytoryi adnoj z krain NATA». Voś u hetym nasamreč vybar», — kaža Chadarkoŭski.
Chadarkoŭski ličyć, što Zachad pavinien admovicca ad rasijskich enierhanośbitaŭ. Navat kali rasijanie pieraaryjentujuć svaje pastaŭki na Aziju, heta nie kampiensuje strataŭ.
«Ja dumaju, što kali Pucinu daviadziecca pieraaryjentavać pastaŭki nafty i hazu ź Jeŭropy na azijackija rynki, to jon stracić bolš, čym pałovu svaich dachodaŭ — heta pałova dachodaŭ fiederalnaha biudžetu.
Ci zmoža jon u hetym vypadku praciahvać vieści vajnu, i kolki času jon zmoža ŭ hetym vypadku praciahvać vieści vajnu — mnie składana skazać. Ja ŭsio ž nie vajskovy ekśpiert, ale dumaju, što heta budzie vielmi surjozny ŭdar», — miarkuje jon.
«Ja akazaŭsia niedastatkova praniklivym»
Na pytańnie žurnalista, ci nie škaduje Chadarkoŭski, što niekali padtrymlivaŭ Pucina, toj skazaŭ, što tak, jon škaduje, što «ŭ 2000—2001 hodzie ŭsprymaŭ Pucina jak narmalnaha čałavieka».
«Mnie, kaniečnie, chaciełasia b vystupić advakatam samoha siabie i skazać, što jon źmianiŭsia. Viadoma, źmianiŭsia, ale… Tak, ja apynuŭsia siarod tych ludziej, jakich jamu ŭdałosia padmanuć. Tak, ja akazaŭsia niedastatkova praniklivym u toj momant. Ja pra heta škaduju kožny dzień», — skazaŭ Chadarkoŭski.
«Pucin z vysokaj stupieńniu vierahodnaści hetuju vajnu ŭsio ž taki prajhraje»
Chadarkoŭski miarkuje, što Pucin vajnu z Ukrainaj nie vyjhraje, i heta stanie pačatkam kanca režymu.
«Rasijskaja historyja pakazvaje, što prajhranaja vajna — a Pucin z vysokaj stupieńniu vierahodnaści hetuju vajnu ŭsio ž taki prajhraje — pryvodzić na praciahu dvuch hadoŭ da vialikich prablem dla režymu. Ja dumaju, što pucinski režym z hetymi prablemami nie prosta sutykniecca, jon ich z vysokaj stupieńniu vierahodnaści nie pieražyvie.
Dva-piać [hadoŭ] — voś, što ciapier, paśla hetaj dramatyčnaj pamyłki, jakuju ździejśniŭ Pucin u pazicyi dyktatara, ja z vysokaj stupieńniu vierahodnaści advodžu režymu.
Chto moža źmianić Pucina? Chadarkoŭski ličyć pamyłkaj šukać novaha cara dla Rasii.
«Kali vy budziecie šukać dobraha cara dla Rasii, vy ŭvieś čas budziecie sutykacca z padobnymi impierskimi vypleskami, impierska-fašysckimi. Nasamreč, toje, što my pavinny zrabić, što ja imknusia zrabić — heta źmianić nie Pucina, a źmianić režym.
Nam patrebnaja parłamienckaja respublika, nam patrebny realny fiederalizm, nam patrebnaje realnaje miascovaje samakiravańnie, i ciapier, što mianie raduje, žychary vialikich haradoŭ pastupova heta pačynajuć uśviedamlać. Nam nie ŭdasca pabudavać adzinuju demakratyčnuju Rasiju, Rasija budzie šmatukładnaj u palityčnym sensie», — miarkuje jon.
Ciapier čytajuć
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3
Kamientary