Prezident ZŠA Džozef Bajden paćvierdziŭ hatoŭnaść abaraniać Tajvań vajennym šlacham. Pra heta jon zajaviŭ, adkazvajučy na pytańni padčas sumiesnaj pres-kanfierencyi z premjer-ministram Japonii Fumijo Kisidaj, piša Reform.by.
«Vielmi chutka: vy nie chočacie ŭciahvacca vajennym šlacham va ŭkrainski kanflikt pa vidavočnych pryčynach, ci vy hatovyja vajennym šlacham abaraniać Tajvań?» — spytali ŭ Bajdena.
«Tak. Heta abaviazacielstva, jakoje my ŭziali na siabie», — adkazaŭ prezident ZŠA.
Bajden adznačyŭ, što ZŠA pahadzilisia z palitykaj «adzinaha Kitaja», na jakoj nastojvaje Piekin, ale kateharyčna suprać vyrašeńnia pytańnia vajennym šlacham z boku KNR.
«Ale ideja taho, što jon moža być uziaty siłaj, prosta ŭziaty siłaj, niedarečnaja dla ŭsiaho rehijona. Heta stanie čarhovym dziejańniem, padobnym da taho, što adbyłosia va Ukrainie. Heta ciažar, jaki budzie navat ciažejšy», — dadaŭ Bajden.
Padčas pres-kanfierencyi Fumijo Kisida taksama zajaviŭ, što ZŠA i Japonija nie źmiracca sa sprobami dzie b tam ni było źmianić isnujučy suśvietny paradak siłavym šlacham. Jon dekłaravaŭ namier dźviuch krain vyrašać prablemy, jakija ŭźnikli z-za napadu Rasii na Ukrainu. Taksama ZŠA, Japonija i Paŭdniovaja Kareja buduć ciesna supracoŭničać pa paŭnočnakarejskaj jadziernaj prablemie.
«Japonija i ZŠA kateharyčna abviarhajuć pahrozy ŭžyvańnia jadziernaj zbroi. My zrobim heta važnaj temaj samitu G7 u nastupnym hodzie», — skazaŭ Kisida. Da hetaha jon anansavaŭ praviadzieńnie samitu ŭ Chirasimie.
Kisida taksama zajaviŭ pra hatoŭnaść naraścić abaranazdolnaść Japonii.
«My majem namier karennym čynam uzmacnić abaronazdolnaść našaj krainy. Adpaviednyja płany byli padtrymanyja prezidentam ZŠA. My zaniatyja naroščvańniem svajoj abaronnaj mocy, uličvajučy pry hetym situacyju vakoł Tajvania», — adznačyŭ jon.
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary