Karparacyja Marka Cukierbierha Meta zaniałasia raspracoŭkaj novych płatnych funkcyj dla sacyjalnych sietak Facebook, Instagram i mesendžara WhatsApp. Pra heta paviedamlaje The Verge sa spasyłkaj na ŭnutranuju rassyłku Meta dla supracoŭnikaŭ.
Dla hetaha Meta stvaryła śpiecyjalnaje padraździaleńnie. Jaho zadača — raspracoŭka płatnych funkcyj, jakija dapamohuć Meta kampiensavać rekłamnyja dachody, jakija vypadajuć z-za novaj palityki pryvatnaści Apple. Uznačaliŭ hrupu pad nazvaj New Monetization Experiences («Novy vopyt manietyzacyi») Pracici Rajčudchury, jaki raniej kiravaŭ daśledčym adździełam Meta.
Vice-prezident Meta pa manietyzacyi Džon Chiehieman, u svaju čarhu, zajaviŭ, što, niahledziačy na raspracoŭku novych płatnych funkcyj, kampanija nie płanuje dazvalać karystalnikam Facebook, Instagram i WhatsApp chavać rekłamu ŭ prahramach za hrošy. Jakija novyja płatnyja funkcyi raspracoŭvaje Meta, jon nie ŭdakładniŭ, ale vykazaŭ nadzieju, što karystalniki imi zacikaviacca i buduć hatovyja płacić.
Tym časam stała viadoma, što sacsietka Twitter viasnoj chacieła ŭvieści manietyzacyju kantentu dla darosłych praz płatnyja padpiski pavodle pryncypu OnlyFans. Ale ŭ vyniku jana admoviłasia ad idei, pakolki nie spraŭlajecca z maderacyjaj navat najaŭnaha kantentu.
Ciapier čytajuć
U Minsku pradajuć dom na vadzie. Kolki prosiać za niezvyčajny abjekt na Čyžoŭskim vadaschoviščy?3
Kamientary