Film «Mara» Sašy Kułak pryznany pieramožcam biełaruskaha konkursu «Paŭnočnaje źziańnie»
Dakumientalny film režysiorki Sašy Kułak «Mara» pryśviečany padziejam 2020 hoda ŭ Biełarusi. Režysiorka ŭ im spałučaje dakumientalnyja kadry ź mirnych pratestaŭ z pastanovačnymi scenami.
«Heta ŭnikalny i pryhožy film, u jakim dakumientalny apovied spałučajecca z fantazijaj, kab daśledavać vielmi aktualnuju i važnuju temu. Heta nie tolki ahučvańnie niespraviadlivaści, ale i prastora dla ŭjaŭleńnia», —
tak prakamientavała svoj vybar mižnarodnaje žury fiestyvalu kino Paŭnočnych i Bałtyjskich krain «Paŭnočnaje źziańnie», jakoje składajecca z Natalli Libet (Ukraina), Sakarysa Story (Farerskija astravy) i Pamieły Toła (Finlandyja).
Da hetaha «Mara» ŭžo atrymlivała prestyžnyja ŭznaharody — naprykład, Silver Eye Award, jakaja dastajecca samym kreatyŭnym dakumientałkam z Centralnaj i Uschodniaj Jeŭropy.
Sa słoŭ samoj režysiorki, hety film pryśviečany palitviaźniam, «jakija siadziać u turmie za toje, što dumali jak my i vychodzili na vulicy jak my».
Žury taksama adznačyła jašče dva biełaruskija kinatvory.
«Kali kvietki nie maŭčać» Andreja Kuciły. «Nieprycharošany i adkryty apovied nadaje padziejam, ludziam i asobam, jakija ŭ im adlustravanyja, značnuju prysutnaść — dziakujučy huku i čorna-biełaj vobraznaści, stvarajučy film adnačasova kiniematahrafičnym i čałaviečnym».
«Shirey Mara» Naty Karniejevaj. «My zaklikajem režysiorku takoj asablivaj i kranalnaj animacyi praciahvać vyvučać hetaje mastackaje asiarodździe, adnačasova kultyvujučy i pieściačy svoj niezvyčajny styl».
Konkurs biełaruskich stužak na fiestyvali Paŭnočnych i Bałtyjskich krain «Paŭnočnaje źziańnie» ładziŭsia ŭ hetym hodzie treci raz. Arhanizatary sabrali admietnuju, cikavuju i źmiastoŭnuju prahramu, dzie znajšłosia miesca i ŭžo tytułavanym pracam biełaruskich kiniematahrafistaŭ, i stužkam, što demanstravalisia na placoŭcy «Źziańnia» ŭpieršyniu. Usiaho ŭ Biełaruskim konkursie było pakazana adzinaccać filmaŭ: častka ź ich demanstravałasia anłajn, častka — afłajn u kinateatrach Vilni i Talina.
Čytajcie taksama:
Kinafiestyval «Paŭnočnaje źziańnie» prezientavaŭ biełaruskuju prahramu. Što pahladzieć anłajn i na vialikim ekranie?
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary