Kuviejt u piać razoŭ pavialičvaje ekspart dyzielnaha paliva ŭ Jeŭropu
Kuviejt pavialičyć u piać razoŭ — da 2,5 młn ton, ci prykładna da 50 000 barelaŭ u dzień, — ekspart dyzielnaha paliva ŭ Jeŭropu ŭ 2023 hodzie, kab dapamahčy kampiensavać skaračeńnie pastavak z Rasii. Taksama Kuviejt padvoić da 5 młn ton ekspart u ES avijapaliva, paviedamlaje ahienctva Bloomberg sa spasyłkaj na svaje krynicy.
Jeŭrasajuzu pahražaje patencyjny niedachop dyzpaliva z 5 lutaha, kali ŭstupaje ŭ siłu zabarona impartu naftapraduktaŭ z Rasii. Pa infarmacyi Bank of America, ceny na dyzielnaje paliva mohuć vyraści da 200 dalaraŭ za barel užo ŭ pieršym kvartale 2023 hoda z-za jeŭrapiejskaha embarha.
Na kaniec minułaha hoda ES kuplaŭ amal 1,3 młn barelaŭ u dzień naftapraduktaŭ z Rasii. Prykładna pałova ich prypadała na dyziel.
Kuviejt u apošnija hady vydatkavaŭ dziasiatki miljardaŭ dalaraŭ na madernizacyju i budaŭnictva novych naftapierapracoŭčych zavodaŭ. Jaho najbujniejšym układańniem było budaŭnictva zavoda Al-Zur — adnaho z najbujniejšych naftapierapracoŭčych zavodaŭ u śviecie, raźličanaha na pierapracoŭku 615 000 barelaŭ syroj nafty ŭ dzień. U kancy minułaha hoda zavod upieršyniu adpraviŭ na ekspart dyzielnaje paliva i paliva dla reaktyŭnych ruchavikoŭ.
Ahulnaja mahutnaść pierapracoŭki Kuviejta vyraście prykładna da 1,5 młn barelaŭ u dzień paśla taho, jak Al-Zur budzie całkam uviedzieny ŭ ekspłuatacyju.
Čakajecca, što inšyja blizkaŭschodnija vytvorcy nafty, jak Saudaŭskaja Aravija i Abjadnanyja Arabskija Emiraty, taksama pavialičać ekspart dyzpaliva ŭ Jeŭropu ŭ 2023 hodzie.
Kamientary