Kali ŭ vas prablemy z zasynańniem, pasprabujcie lažać i ŭspaminać pra ščaślivyja epizody ź minułaha, raić The Wall Street Journal.
Štoviečar, ležačy ŭ łožku, Endzi Buełou dumaje znoŭ i znoŭ: jak cudoŭna było ŭ dziacinstvie jeździć na paromie cieraz voziera Mičyhan. Jon ujaŭlaje siabie na karabli i navat čuje huł matoraŭ, huki burlivaj vady, adčuvaje pach aziornaj vady i chałodnyja pyrski na tvary.
«Kali ja ŭspaminaju hetyja adčuvańni, to zasynaju praź niekalki chvilin», — kaža 61-hadovy Buełou, vykanaŭčy dyrektar simfaničnaha arkiestra ŭ Maskiehanie, štat Mičyhan.
Usie viedajuć, što, kab zabiaśpiečyć dobry son, treba staracca kłaścisia ŭ adzin i toj ža čas, nie hladzieć pierad snom u smartfon i ŭ cełym stvaryć u domie spakojnuju abstanoŭku. Adnak toje, pra što my dumajem, kali sprabujem zasnuć, nie mienš važna. I najlepšym rašeńniem budzie papraktykavacca ŭ «smakavańni» pazityŭnaha dośviedu, jaki my kaliści atrymali ŭ žyćci.
Kali vy «smakujecie» ščaślivy ŭspamin, mozh reahuje tak, byccam vy pieražyvajecie hety pryjemny vopyt znoŭku, kaža Sara Miednik, nieŭrapatołah i prafiesar kahnityŭnych navuk z Univiersiteta Kalifornii ŭ Irvinie. Aktyŭnaść simpatyčnaj niervovaj sistemy, što adkazvaje za reakcyju na stres, źnižajecca. I pavialičvajecca aktyŭnaść parasimpatyčnaj niervovaj sistemy, jakaja viartaje arhanizm u spakojny stan.
Kali vy hatovyja pryniać ščaślivy ŭspamin u jakaści snatvornaha, to najpierš vam treba pakinuć usialakija razvažańni. Dla hetaha za niekalki hadzin da snu možna zapłanavać «sieans tryvohi» — pastavić tajmier na 15 chvilin i dazvolić svajmu rozumu strašycca ŭsimi mahčymymi sposabami. Zapišycie ci prahavarycie ŭsie kłopaty, jakija vas čakajuć. Kali čas skončycca, zaharnicie natatnik i bolš da zhadanych pytańniaŭ nie viartajciesia. Takaja praktyka daść mahčymaść «źlić» niehatyŭ zahadzia i pazbavić ad zvyčki tryvožna razvažać pierad snom.
Pierad tym, jak kłaścisia spać, abiarycie svoj ščaślivy ŭspamin — zhadku pra śviatkavańnie dnia narodzinaŭ ci najlepšyja momanty adpačynku (taksama heta moža być mara pra toje, što vy ź nieciarpieńniem chočacie zrabić u budučyni). Zasynajučy, starajciesia ŭjavić abrany epizod z uvahaj da ŭsich mahčymych adčuvańniaŭ: taktylnych, smakavych, vizualnych, aŭdyjalnych, — uznaŭlajcie ŭ svajoj fantazii jak maha bolšuju kolkaść detalaŭ. Jak adznačaje doktar Miednik, praz heta kroŭ budzie prylivać da tych častak vašaha cieła, što źviazanyja z pryjemnymi adčuvańniami, i adchłynać ad učastkaŭ mozhu, jakija zapuskajuć miechanizm tryvohi. Heta dapamoža vam rassłabicca.
Jak i ź luboj novaj zvyčkaj, spatrebicca čas, kab prystasavacca. Nie zdavajciesia, kali spačatku budzie ciažka. Mahčyma, varta papraktykavacca zahadzia — na praciahu dnia. Heta zaadno ŭmacuje pamiać, a ŭviečary dapamoža vašamu mozhu chutčej viarnucca da «ščaślivaha ŭspaminu».
Ekśpierty naohuł rajać praktykavać takija 10-chvilinnyja ŭjaŭleńni pryjemnych rečaŭ niekalki razoŭ na tydzień — tak vy nie tolki adpracujecie sposab, jak chutčej zasynać, ale i zajmiejecie dadatkovy mietad, jak źnižać ułasnuju reakcyju na stres u štodzionnaści.
Kamientary