Bloomberg: Pucin rychtuje novy nastup na Ukrainu, vajna moža zaciahnucca na hady
Praz amal hod paśla ŭvarvańnia, jakoje pavinna było zaniać niekalki tydniaŭ, rasijski prezident Uładzimir Pucin rychtuje novy nastup na Ukrainu, u toj ža čas rychtujučy svaju krainu da kanfliktu z ZŠA i ich sajuźnikami, havorycca ŭ artykule ahienctva Bloomberg. Pa jaho acency, Pucin padrychtavaŭsia i da taho, što kanflikt budzie doŭžycca hadami.
Kreml imkniecca prademanstravać, što jaho vojski mohuć viarnuć sabie inicyjatyvu paśla niekalkich miesiacaŭ adstupleńnia, akazvajučy cisk na Kijeŭ i jaho sajuźnikaŭ dla taho, kab jany pahadzilisia na niejkaje pieramirje, jakoje dazvolić Rasii zachavać kantrol nad terytoryjaj, jakuju jana ciapier akupuje. Tak apisali situacyju rasijskija aficyjnyja asoby i ich daradcy ŭ razmovach z Bloomberg.
Navat Pucin nie moža admaŭlać słabyja baki rasijskaj armii, na ŭmacavańnie jakoj jon vydatkavaŭ dziesiacihodździ. Rasijskija vojski stracili bolš za pałovu pieršapačatkovych zavajoŭ va Ukrainie, piša ahienctva. Jaho krynicy raspaviali, što pastajannyja niaŭdačy na froncie mnohich u Kramli prymusili bolš realistyčna stavicca da svaich ambicyj i pryznać, što navat utrymańnie ciapierašniaj linii frontu było b dasiahnieńniem.
Adnak Pucin pa-raniejšamu pierakanany, što bolš bujnyja siły i hatoŭnaść Rasii nieści straty (jakija ŭžo ciapier vyličajucca dziasiatkami tysiač, pavodle acenak ZŠA i Jeŭropy) dazvolać joj atrymać pieramohu, niahledziačy na niaŭdačy.
Adnaŭleńnie nastupu moža pačacca ŭžo ŭ lutym-sakaviku, vykazali zdahadku krynicy Bloomberg, blizkija da Kramla. Ich kamientaryi adpaviadajuć pieraściaroham Ukrainy i jaje sajuźnikaŭ, i nastup moža pačacca da taho, jak Kijeŭ atrymaje bajavyja tanki z ZŠA i Jeŭropy.
Rašučaść Pucina pradviaščaje śmiarotnuju eskałacyju vajny, pakolki Kijeŭ rychtujecca da nastupu i adchilaje lubyja varyjanty pieramirja, jakija pakinuli b Rasii akupavanyja joj terytoryi. Pucin ličyć, što ŭ jaho niama alternatyvy, akramia jak pieramahčy ŭ kanflikcie, jaki jon ličyć ekzistencyjalnym. Novy vitok mabilizacyi mahčymy ŭžo hetaj viasnoj, ličać krynicy Bloomberg, a ekanomika i hramadstva ŭsio bolš padładžvajucca pad patreby vajny.
Amierykanskija i jeŭrapiejskija raźviedki zadajucca pytańniem, ci jość u Rasii resursy dla novaha bujnoha nastupleńnia, u toj čas jak sajuźniki Ukrainy ŭpieršyniu rychtujucca adpravić bajavyja tanki, jakija mahli b dapamahčy ŭkrainskim vojskam prarvać rasijskija pazicyi, havorycca ŭ artykule.
Ciapier čytajuć
Niežyvym znojdzieny ŭ Varšavie Źmicier Kaśpiarovič — 43-hadovy były palitviazień, zavierbavany KDB3
Kamientary