Prezidentam Čarnahoryi abrany Jakaŭ Miłatavič. Jon pieramoh Miła Džukanaviča, jaki kiravaŭ krainaj bolš za 30 hadoŭ
Paśla druhoha tura prezidenckich vybaraŭ u Čarnahoryi pieramohu atrymaŭ były ministr ekanomiki Jakaŭ Miłatavič. Takim čynam, krainu bolš nie budzie ŭznačalvać jaho sapiernik — dziejny prezident Miła Džukanavič, jaki ź nievialikimi pierapynkami kiravaŭ Čarnahoryjaj z 1991 hoda, piša BBC.
Pa danych Centra pa manitorynhu i daśledavańniam (CEMI), Miłatavič atrymaŭ bolš za 60% hałasoŭ.
37-hadovy Miłatavič zjaŭlajecca adnym z zasnavalnikaŭ pravacentrysckaha ruchu «Jeŭropa ciapier» i zajmaje pasadu namieśnika jaho lidara.
U pieradvybarnyja abiacańni Miłataviča ŭvachodziła baraćba z karupcyjaj, palapšeńnie ŭzroŭniu žyćcia i kurs na ŭstupleńnie Čarnahoryi ŭ ES.
Pry hetym, jak pieradaje karespandent Bi-bi-si na Bałkanach, jaho padtrymlivajuć partyi, blizkija da Sierbii, Rasii i pravasłaŭnaj carkvy.
U niadzielu viečaram Džukanavič pryznaŭ paražeńnie i pavinšavaŭ svajho sapiernika ź pieramohaj.
Pa danych CEMI, jaŭka vybarščykaŭ skłała kala 70%. Čakajecca, što dziaržaŭnaja vybarčaja kamisija abjavić aficyjnyja vyniki ŭ najbližejšyja dni paśla taho, jak buduć razhledžanyja ŭsie skarhi na parušeńni padčas hałasavańnia, kali takija buduć padadzienyja.
Za čas svajoj palityčnaj karjery Džukanavič pryvioŭ Čarnahoryju da siabroŭstva ŭ NATA ŭ 2017 hodzie, a taksama da statusu kandydata na ŭstupleńnie ŭ Jeŭrapiejski sajuz.
Paśla rasijskaha ŭvarvańnia va Ukrainu Čarnahoryja dałučyłasia da sankcyj, uviedzienych ES suprać Kramla, i vysłała niekalki rasijskich dypłamataŭ. Rasija ŭklučyła Čarnahoryju ŭ lik niedružalubnych krain.
Pry hetym palityčnyja supierniki nieadnarazova abvinavačvali Džukanaviča i jaho partyju ŭ karupcyi, suviaziach z arhanizavanaj złačynnaściu i ŭ tym, što jon kiruje respublikaj, jak svajoj asabistaj votčynaj. Usie hetyja abvinavačańni jon zaŭsiody admaŭlaŭ.
Padčas pieradvybarnaj kampanii Džukanavič taksama staviŭ pad pytańnie zdolnaść Miłataviča pryvieści Čarnahoryju ŭ ES i kazaŭ, što jon moža być padvierhnuty ŭpłyvu prasierbskich sił.
Čytajcie taksama:
U Finlandyi prajšli parłamienckija vybary. Premjerka Sana Maryn sydzie z pasady
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam17
Kamientary