Za sakavik pa kryminalnych palityčnych spravach asudzili nie mienš za 62 čałavieki
Pravaabaroncy «Viasny» ŭ sakaviku fiksavali praciah tendencyi kryminalnaha pieraśledu i asudžeńnia hramadzian pavodle palityčnych matyvaŭ. Ahulnaja kolkaść ludziej, jakija mahli być represavany za minuły miesiac, składaje pryblizna 162 čałavieki. Pravaabaroncam viadoma pra nie mienš jak 62 asudžanych u kryminalnym paradku hramadzian, ź jakich 44 mužčyny, 18 — žančyn.
U adnosinach da šaści čałaviek vyniesieny abvinavaŭčyja pryhavory ŭ paradku zavočnaj vytvorčaści (piać čałaviek pa spravie Kaardynacyjnaj rady i adzin čałaviek pa spravie «Viasny»). Treci miesiac zapar praciahvajecca tendencyja siarod abłasnych sudoŭ da ŭzmacnieńnia žorstkaści prysudaŭ, jakija byli vyniesieny rajonnymi sudami. Mahiloŭskim i Viciebskim abłasnymi sudami źmienieny pakarańni fihurantam dyfamacyjnych spraŭ, asudžanych u kancy 2022 hoda, z «chatniaj chimii» na pazbaŭleńnie voli.
Viarchoŭny Sud źmianiŭ prysud Hrodzienskaha abłasnoha suda ad 17 kastryčnika 2022 hoda ŭ dačynieńni da Mikałaja Aŭtuchoviča ŭ častcy asudžeńnia pavodle č. 1 art. 295-3 KK, Iryny Haračkinaj u častcy asudžeńnia pavodle č. 1 art. 405 KK — vyrašana vyzvalić ich ad pryznačanaha pa nazvanych artykułach prysudu praz skančeńnie terminaŭ daŭniny.
Sumarna, pa viadomych pravaabaroncam faktach asudžeńnia, u sakaviku sudy vynieśli:
- 166 hadoŭ 5 miesiacaŭ pazbaŭleńnia voli ŭ dačynieńni da 36 čałaviek;
- 55 hadoŭ 6 miesiacaŭ abmiežavańnia voli biez nakiravańnia ŭ papraŭčuju ŭstanovu («chatniaja chimija») u dačynieńni da 24 čałaviek;
- 3 miesiacy aryštu dla adnaho čałavieka;
- 400 bazavych vieličyń na sumu 488 400 rubloŭ u jakaści dadatkovaha pakarańnia ŭ dačynieńni da 12 čałaviek, 11 ź jakich asudžany da pazbaŭleńnia voli, adzin — da «chatniaj chimii»;
- 5 hadoŭ pazbaŭleńnia prava zajmać pasacy, źviazanyja z vykanańniem arhanizacyjna-rasparadčych i administracyjna-haspadarčych abaviazacielstvaŭ razam z pazbaŭleńniem voli ŭ jakaści dadatkovaha pakarańnia ŭ dačynieńni da adnaho čałavieka;
- prymusovaje lačeńnie ad chraničnaha ałkahalizmu razam z pazbaŭleńniem voli i štrafam u dačynieńni da adnaho čałavieka.
Pa viadomych pravaabaroncam prysudach u sakaviku sudy prymianiali pakarańnie, źviazanaje z pazbaŭleńniem voli, u 58,1% vypadkaŭ kryminalnaha asudžeńnia hramadzian, «chatniuju chimiju» — u 38,7%, aryšt — u 1,6%, štraf — u 1,6%.
Takim čynam, u sakaviku pakarańnie pa palityčna matyvavanych kryminalnych spravach, źviazanaje z pazbaŭleńniem voli, jaje abmiežavańniem u vyhladzie «chatniaj chimii» i aryštam sudy prymianiali ŭ 98,4% vypadkaŭ asudžeńnia fihurantaŭ palityčna matyvavanych kryminalnych spraŭ.
Ciapier čytajuć
Hurt «Drazdy» pakidaje scenu i vinavacić u hetym «hipieraktyŭnych błohieraŭ»3
Kamientary