Kinakrytyk Ihar Sukmanaŭ dałučyŭsia da kamandy «Paŭnočnaha źziańnia»
Viadomy kinaanalityk dałučyŭsia ŭ jakaści prahramnaha dyrektara biełaruskaha konkursu.
Ihar Sukmanaŭ — siabar Jeŭrapiejskaj kinaakademii i prezident biełaruskaj siekcyi Mižnarodnaj fiederacyi kinakrytykaŭ (FIPRESCI). Z 2021 hoda jon uvachodzić u skład Prahramnaj kansultatyŭnaj rady Adeskaha mižnarodnaha kinafiestyvalu. A niadaŭna dałučyŭsia da kamandy Varšaŭskaha kinafiestyvalu jak prahramny dyrektar, paviedamlajuć arhanizatary.
Akramia hetaha, Ihar Sukmanaŭ i Vola Čajkoŭskaja, dyrektarka kinafiestyvalu «Paŭnočnaje źziańnie», uvajšli ŭ lik zasnavalnikaŭ Biełaruskaj niezaležnaj akademii, ab stvareńni jakoj abjavili na Bierlinale sioleta. Tam i pačałosia supracoŭnictva kinaanalityka z kinafestam «Paŭnočnaje źziańnie».
«Pakolki Vola Čajkoŭskaja zaprasiła mianie zajmacca prahraminham u krainie, dzie zaradziŭsia ramantyzm, to asacyjacyi, jakija prychodziać na rozum u suviazi z budučaj pracaj, možna apisać nastupnym čynam, — adznačaje Ihar Sukmanaŭ. — Biełaruskaje kino va ŭsie časy ŭjaŭlała dla mnohich nievyrašalnuju zahadku. Aficyjnaje i niezaležnaje, jano časta było to impierskim fantomam, to partyzanskaj chranatopju. U apošnija hady jaho hołas zahučaŭ asabliva pa-junacku: dziakujučy ličbavaj revalucyi, u industryju pryjšło pakaleńnie, jakomu niama jašče 30 hadoŭ, i my navat zaśpieli roskvit cełaj chvali ŭ niaprostyja dni «bury i nacisku».
Ale siońnia žyćcio padkidvaje novaje vyprabavańnie — ledź prabiŭšysia na pavierchniu, apynuŭšysia ŭ centry mižnarodnaj uvahi prafiesijanałaŭ i hledačoŭ, niezaležny kiniematohraf Biełarusi pa-raniejšamu viadzie pryvidnaje isnavańnie. Jaho pradstaŭniki raskidanyja pa ŭsim śviecie, jaho filmy nie zaŭsiody i nie ŭsiudy dastupnyja, a «praklataje» pytańnie ab jaho isnavańni nijak nie vyklučajecca z paradku dnia. Ułasna, nam ničoha inšaha nie zastajecca, jak raźvienčvać skiepsis i nie dapuścić mantažnaha pryjomu «sychod u zaciamnieńnie».
Ihar Sukmanaŭ 11 hadoŭ kuryravaŭ prahramnuju siekcyju ihravoha kino Mižnarodnaha kinafiestyvalu «Listapad» u Minsku — da momantu adchileńnia «Art-Karparejšn» ad praviadzieńnia minskaha kinaahladu, a krychu paźniej likvidacyi kampanii pa rašeńni Minharvykankama. Pad jaho kiraŭnictvam «Listapad» pradstaŭlaŭ kino byłoha SSSR abo krain z ahulnym kamunistyčnym minułym Uschodniaj Jeŭropy, Azii, uklučajučy Kitaj. Na pytańnie: «Čym budzie zajmacca «Paŭnočnaje źziańnie» sioleta z udziełam Ihara Sukmanava?» — kinaanalityk adkazvaje mietafaryčna:
«Šukać paparać-kvietku, bo, jak infarmuje nas «Vikipiedyja», mifičnaja kvietka, jakaja adkryvaje jaje ŭładalniku skarby i tajamnicy śvietu, daruje prazorlivaść i ŭładu nad niačystym ducham. My budziem farmavać i demanstravać nacyjanalnuju prahramu filmaŭ, jakija buduć umacoŭvać duch praŭdy, tvorčaj svabody i nieŭtajmoŭnaj voli śćviardžać bol i ščaście być biełarusam».
Kinafiestyval «Paŭnočnaje źziańnie» ŭ 2022 hodzie častkova viarnuŭsia ŭ offline i sabraŭ poŭnyja zały ŭ Talinie i Vilni, a achvotnych hladzieć filmy festu online nabrałasia bolš za 2 tysiačy čałaviek. Hledačam jašče nieviadomyja daty «Paŭnočnaha źziańnia — 2023». Adnak kab dać mahčymaść kamandzie kinafiestyvalu praciahvać pakazvać biełarusam i biełaruskam jakasnaje kino — padtrymajcie ich dziejnaść danatam.
Ciapier čytajuć
«Na karabli kožny dzień — paniadziełak». Biełaruska raskazała pra svaju pracu na kruiznym łajniery4
Kamientary