Pasiadžeńnie hramadska‑kansultacyjnaj rady pry Administracyi prezidenta, što pavinna było adbycca ŭ piatnicu 13 listapada, admienienaje.
Pasiadžeńnie hramadska‑kansultacyjnaj rady pry Administracyi prezidenta, što pavinna było adbycca ŭ piatnicu 13 listapada, admienienaje.
Niezadavolenaść kiraŭnika Administracyi prezidenta Uładzimira Makieja vyklikali «vystupleńni ŭ ŚMI asobnych apazicyjnych dziejačaŭ, jakija jość siabrami Rady, što HKS źjaŭlajecca butaforskaj i dekłaratyŭnaj strukturaj».
«Hramadska‑kansultacyjnaja rada stvarałasia nie pad palityčnuju kanjunkturu, a dla realnaj raboty.
Ułada ličyć, što luboje mierkavańnie pavinna być pačuta, i ni adna ideja, jakaja moža prynieści karyść krainie. Rada stvaryła miechanizm realnaha dyjałoha ludziej, jakija prytrymlivajucca roznych punktaŭ hledžańnia», — piša ŭ svajoj zajavie U.Makiej.
Kiraŭniku Administracyi prezidenta nie padabajucca napadki na Radu niekatorych apazicyjnych dziejačaŭ. A napiaredadni pasiadžeńnia pa źmienach u vybarčy kodeks nabyli «asabliva raźviazny charaktar».
«Zrazumieła, što metaj tendencyjnych publikacyj źjaŭlajecca nie sutnaść pytańnia (na jaje aŭtaram, miarkujučy pa ŭsim, prosta naplavać), a sproba ahulna dyskredytavać HKS i naohuł samu ideju dyjałoha ŭłady z hramadskimi dziejačami, jakija prytrymlivajucca roznych palityčnych pierakanańniaŭ», — praciahvaje U.Makiej.
«Vidavočny paradoks! Mnohija hady lidery palityčnaj apazicyi paŭsiul, i pierš za ŭsio ŭ ES, nastojvali na dyjałohu z uładaj.
Ale jak tolki ŭłada pa ŭłasnaj inicyjatyvie stvaryła efiektyŭnuju placoŭku dla pramoha dyjałoha z roznymi hramadskimi (u tym liku i apazicyjnymi) siłami, niadobrasumlennyja palityki i žurnalisty, jakija ich absłuhoŭvajuć, złosna atakavali samu ideju hramadska‑kansultacyjnaj rady», — kaža kiraŭnik Rady.
Makiej havoryć, što ŭsie prapanovy nie tolki «dobrazyčliva vysłuchoŭvajucca» i «prymajucca da viedama», ale i realizoŭvajucca ŭ kankretnych rašeńniach dziaržaŭnych orhanaŭ.
«Kali b ułada i apazicyja zaŭsiody i va ŭsim pahadžalisia adna z adnoj, to ŭłada pierastała b być uładaj, a apazicyja — apazicyjaj», — skančvaje zvarot U.Makiej.
Siabar Rady hałoŭny redaktar «BDH» Piatro Marcaŭ kaža, što rana kazać ab spynieńni dziejnaści HKS.
«U liście napisana, što Makiej źbirajecca ŭziać tajm‑aŭt i pravieści kansultacyi ź jaje siabrami ab dalejšaj dziejnaści. Zhadziciesia, pieranos adnaho pasiadžeńnia i prypynieńnie pracy — heta roznyja rečy», — kaža P.Marcaŭ.
Inšy siabar Rady, były staršynia Nacbanku Stanisłaŭ Bahdankievič zaznačaje: «Ja viedaju, što ŭsio ŭ našaj krainie robicca sa zhody vyšejšaha čynoŭnika. I zahad Makieju ab prypynieńni dziejnaści HKS, dumaju, daŭ sam Łukašenka. Sapraŭdy, Rada mieła mała vodhuku ŭnutry hramadstva. Ale ja liču navat takaja Rada była karysnaj, i jaje rospusk jość krokam nazad. Ja zhadziŭsia stać siabram HKS, ale nikoli nie zhadžaŭsia paddakivać pradstaŭnikam ułady».
Hramadska‑kansultacyjnaja rada była stvoranaja ŭ studzieni sioleta. U toj čas padobnyja Rady ŭłady stvarali ŭ halinie ekanomiki, ŚMI, kultury.
U Radu, jakuju ŭznačaliŭ Uładzimir Makiej, uvajšli šerah pradstaŭnikoŭ apazicyi i niezaležnaha hramadstva — Aleh Trusaŭ, Stanisłaŭ Bahdankievič, Uładzimir Niściuk, Leanid Zaika. Admoviŭsia tolki lider «Ruchu za Svabodu» Alaksandr Milinkievič. Usiaho Rada praviała try pasiadžeńni. Čaćviortaje płanavałasia na 13 listapada pa pytańni vybarčaha zakanadaŭstva.
Stvareńnie kansultacyjnych radaŭ časta nazyvałasia biełaruskimi ŭładami na pieramovach ź jeŭrapiejcami, jak adzin z krokaŭ pa demakratyzacyi.
Kamientary