Pavieł Łatuška abmierkavaŭ z polskimi ŭładami prablemy biełaruskaha biznesu
Pavieł Łatuška pravioŭ pracoŭnuju sustreču pa prablemach raźvićcia biełaruskaha biznesu ŭ Ministerstvie raźvićcia i technałohij Polščy.
Namieśnik kiraŭnicy Abjadnanaha pierachodnaha kabinieta ahučyŭ takija prapanovy, jak
— Pašyreńnie prahramy Poland Business Harbor na bolš šyrokaje koła pradprymalnikaŭ.
Na siońnia ŭžo 93% z bolš čym 75 tysiač viz pa hetaj prahramie vydadzienyja hramadzianam Biełarusi. Pradstaŭniki polskaha boku abiacali razhledzieć pytańnie spraščeńnia vydačy viz dla pradstaŭnikoŭ inšaha inavacyjnaha biznesu, akramia IT-siektara;
— Stvareńnie adukacyjnaj prahramy dla tych, chto žadaje raspačać svaju spravu ŭ Polščy, u halinie pravił viadzieńnia biznesu i formaŭ padtrymki z boku dziaržavy,
a taksama adzinaha infarmacyjnaha partała dla biełarusaŭ ab mahčymaściach i patrabavańniach u śfiery pradprymalnictva. Pradstaŭniki ministerstva rastłumačyli, što takija prahramy płanujecca stvarać jak na ŭzroŭni Polskaha ahienctva raźvićcia pradprymalnictva, tak i na łakalnym uzroŭni — miascovymi arhanizacyjami raźvićcia biznesu i SEZ.
— Stvareńnie mahčymaściaŭ dla rełakacyi biełaruskaha biznesu ŭ Polšču praz bolš pryvabny ŭ paraŭnańni ź Biełaruśsiu padatkovy režym.
Polskim bokam ahučana hatoŭnaść davać ilhoty dla biełaruskich pradprymalnikaŭ pa prahramie IP box pry pracaŭładkavańni moładzi i inš., abmierkavana pytańnie dziejnaści biełaruskich pradprymalnikaŭ u miežach SEZ Polščy.
Na sustrečy abmierkavana mahčymaść stvareńnia dvuchbakovaj kansultacyjnaj hrupy pa pytańniach raźvićcia pradprymalnictva.
Ministerstva raźvićcia i technałohij Polščy hatova na rehularnaj asnovie ŭzajemadziejničać z Kabinietam i biełaruskimi biznes-asacyjacyjami ŭ miežach kansultacyjnych sustreč i na praktycy padtrymać stvareńnie šyrokaha abjadnańnia biełaruskich dziełavych struktur.
Taksama viałasia razmova ab arhanizacyi vosieńniu biahučaha hoda kansultacyjnaj sustrečy šyrokaha koła pradstaŭnikoŭ ź biełaruskaha i polskaha bakoŭ z metaj kompleksnaha razhladu prablem dziejnaści biełaruskaha biznesu ŭ Polščy.
Kamientary