MZS pra pavietranyja šary z cyharetami: Heta transhraničnaja złačynnaść
«Litoŭskamu boku pa niejkaj pryčynie vyhadna ličyć heta hibrydnaj pahrozaj», — śćviardžaje namieśnik ministra Ihar Siekreta.
Kantrabanda cyharet u Litvu źjaŭlajecca zvyčajnaj transhraničnaj złačynnaściu, ź jakoj treba zmahacca sumiesnymi namahańniami, a nie hibrydnaj pahrozaj, jak heta sprabuje padać litoŭski bok. Pra heta zajaviŭ namieśnik ministra zamiežnych spraŭ Ihar Siekreta pa vynikach sustrečy premjer-ministra Alaksandra Turčyna ź litoŭskimi i polskimi pieravozčykami, piša BiełTA.
«Pytańniaŭ u dvuchbakovych adnosinach ź Litvoj šmat. Heta i pytańni biaśpieki, i pravaachoŭnych orhanaŭ, heta i pytańni, napeŭna, užo nadakučlivych dla ŭsich pavietranych šaroŭ, jakimi dastaŭlajecca kantrabanda cyharet, — skazaŭ Ihar Siekreta.
— Nam nie daje damovicca toje, što ŭ nas roznaje razumieńnie taho, što siońnia adbyvajecca na miažy. Litoŭskamu boku pa niejkaj pryčynie vyhadna ličyć heta hibrydnaj pahrozaj, bo za pahrozu ščodra płaciać u Jeŭropie, heta šakiruje, uražvaje i nie patrabuje dadatkovych dyskusij. A my ž ličym, što majem spravu sa zvyčajnaj transhraničnaj złačynnaściu, u jakoj udzielničajuć pradstaŭniki roznych krain. Kali jość roźnica ŭ cenach, zaŭsiody budzie spakusa niešta pastavić u abychod i zarabić na hetym. Heta, ułasna, było zaŭsiody na sumiesnaj miažy, pakul isnavała roźnica ŭ cenach».
Jon padkreśliŭ, što zmahacca z transhraničnaj złačynnaściu treba sumiesna — praz supracoŭnictva i dyjałoh. «A kali kanjunkturna, tady patrebna infarmacyjnaja bomba, jakaja «vybuchaje» i pryciahvaje vielmi šmat uvahi ŭ krainach Jeŭrasajuza. I heta zusim inšyja hrošy. My ž kažam: davajcie pracavać razam i zarablać na hruzapieravozkach, na sumiesnaj navukovaj i kulturnaj dziejnaści. Davajcie adkryjem miažu i zrobim jaje pradkazalnaj i biaśpiečnaj dla hramadzian usich krain — nie tolki dla Biełarusi, Litvy i Polščy», — zaznačyŭ namieśnik ministra.
Nahadajem, što z-za šaroŭ z kantrabandaj niekalki razoŭ parušałasia praca Vilenskaha aeraporta, Litva ŭ vyniku na try tydni zakryła miažu ź Biełaruśsiu, a biełaruskija ŭłady ŭ adkaz nie vypuścili litoŭskija hruzaviki.
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary