«Aŭtamabilnyja strachoŭki paciahnuli na 250 jeŭra». Biełarusy pajechali ŭ adpačynak u Čarnahoryju i ŭlacieli ŭ kapieječku
Paśla taho, jak z 1 červienia pierastali dziejničać «Zialonyja karty», biełaruskija aŭtaamatary sutyknulisia z šeraham prablem pry afarmleńni polisa.
Biełaruskija strachavyja kampanii pierastali afarmlać «Zialonyja karty» z 17 maja. Tamu ŭžo paŭtara miesiaca biełaruskim aŭtamabilistam davodzicca strachavać svoj transpart u zamiežnych strachavych kampanijach, pierš za ŭsio ŭ Litvie i Polščy.
Heta choć i nie vielmi zručna, ale ź finansavaha punktu hledžańnia nijakich dadatkovych vydatkaŭ nie niasie. Prynamsi, pakul vy nie źbirajeciesia jechać u Sierbiju, Čarnahoryju i inšyja krainy Bałkanskaj paŭvyspy, jakija nie ŭvachodziać u ES.
Reč u tym, što «Zialonaja karta», jakuju vypisvali biełaruskija strachavyja kampanii, choć pačatkova i była daražejšaj za tuju, što možna nabyć u Jeŭropie, dziejničała va ŭsich krainach Jeŭropy. Tamu, majučy na rukach taki polis, aŭtaamatar moh dajechać ź im choć da Ałbanii.
Jeŭrapiejskija polisy, jakija pa zmoŭčvańni kuplajuć biełarusy, nie raspaŭsiudžvajucca na takija krainy, jak Ałbanija, Bośnija i Hiercahavina, Paŭnočnaja Makiedonija, Sierbija i Čarnahoryja.
Biełarusy, jakija padzialilisia svajoj historyjaj, sutyknulisia ź niezapłanavanymi vydatkami na strachoŭku, kali jechali ŭ Čarnahoryju praź Sierbiju.
«Na vienhierska-sierbskaj miažy my daviedalisia, što, kab trapić u Sierbiju, nam treba spačatku nabyć asobnuju strachoŭku. Jaje košt nas pryvioŭ u šok», — pryznajecca surazmoŭca.
Za polis na 30 dzion na lehkavy aŭtamabil biełarusam daviałosia zapłacić 195 jeŭra.
«Na hranicy nam paviedamili, što takija ceny na strachoŭku prymianiajuć tolki ŭ dačynieńni da aŭto na biełaruskaj i rasijskaj rehistracyi. Maŭlaŭ, tak strachavyja kampanii adreahavali na navinu pra toje, što biełarusy i rasijanie nie mohuć bolš vypisvać polisy ŭ siabie», — kaža surazmoŭca.
Paśla prajezdu Sierbii biełarusam daviałosia zastrachavać aŭtamabil na ŭjeździe ŭ Čarnahoryju. Tam samy tanny polis kaštavaŭ usiaho 20 jeŭra.
Ahułam tolki na strachavyja polisy, kab dabracca ź Biełarusi ŭ Čarnahoryju, u biełaruskich padarožnikaŭ syšło 252 jeŭra. Dla paraŭnańnia, biełaruskaja «Zialonaja karta», ź jakoj možna było prajechać praz usie vyšej apisanyja krainy, kaštavała 30 jeŭra na 15 dzion i 50 jeŭra na miesiac.
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary