Dzie biełarusy płanujuć adpačyvać? Dziaržaŭnyja sacyjołahi ŭ topie zamiežnych kirunkaŭ nazyvajuć Picier, Maskvu i Krym
Kala 90% biełarusaŭ u hetym hodzie nie płanujuć adpačyvać za miažoj. A kolkaść tych, chto ličyć adpačynak i vandroŭki važnaj častkaj svajho žyćcia, za try hady źmienšyłasia na 14%. Takija ličby pakazała dziaržaŭnaje sacapytańnie.
Instytut sacyjałohii Nacyjanalnaj akademii navuk Biełarusi apošnija try hady pravodzić sacyjałahičnaje apytańnie nakont taho, jakim biełarusy bačać svoj adpačynak. Apytańnie robiać siarod haradskoha i sielskaha nasielnictva pa stacyjanarnym telefonie.
Jak śćviardžajecca, absalutnaja bolšaść apytanych (88,2%) bačać svoj adpačynak u Biełarusi. U 2022 hodzie, pavodle hetaha ž apytańnia, nie źbirałasia vyjazdžać za miažu padčas adpačynku i vychadnych 83,8% biełarusaŭ.
Voś jak vyhladaje top-3 krain, jakija biełarusy-vandroŭniki płanujuć naviedać u 2023 hodzie: na pieršym miescy Rasija (42,3%), na druhim — Turcyja (11%), na trecim — krainy Jeŭropy (7,9%).
Mikałaj Suchocki, namieśnik dyrektara pa navukovaj i inavacyjnaj rabocie Instytuta sacyjałohii Nacyjanalnaj akademii navuk adznačyŭ: «Raniej u hetym topie była b Ukraina, ale ciapier jaje niama pa abjektyŭnych pryčynach. Krychu ździŭlaje, što niama Bałharyi — papularnaha napramku dla biełarusaŭ. Situacyja mianiajecca».
Najbolš papularnymi miescami dla padarožža ŭ Rasiju dla biełarusaŭ stali Sankt-Pieciarburh (40,4%) i Maskva (23,1%). Na treciaje miesca dziaržaŭnyja sacyjołahi pastavili akupavany Krym (9,5%), jaki jany adnieśli da Rasii. Kali paraŭnoŭvać ź minułymi hadami, to ŭ 2022-m biełarusy płanavali naviedvać u pieršuju čarhu Sankt-Pieciarburh (26%), na druhim miescy byŭ Krym (21,5%), na trecim — Sočy (13,8%).
Jašče krychu cikavych aficyjnych danych: u 2021 hodzie adpačynak dy vandroŭki važnaj častkaj žyćcia ličyła 87,7% respandentaŭ, u 2022 — 75,6%, a ŭ 2023 — 73,7%. Mikałaj Suchocki bačyć pryčynu ŭ pandemii karanavirusa: «Dla ŭsioj industryi turyzmu ŭ našaj krainie i śviecie ŭ cełym stres-testam staŭ kavid. Ludzi vielmi chacieli padarožničać, i hetaje imknieńnie adlustroŭvajuć ličby za 2021 hod. A ŭ nastupnyja hady my bačym stabilizacyju ličbaŭ na ŭzroŭni 73—75%».
Ź jakoj metaj biełarusy vandrujuć pa svajoj krainie? Kali vieryć daśledavańniu, 41,1% — kab naviedać pryrodnyja abjekty (zapaviedniki, lasy, aziory), 39,6% — kab sustrecca sa svajakami i naviedać małuju radzimu, 35,2% — kab naviedać histaryčnyja, kulturnyja miescy.
Siarod najbolš papularnych varyjantaŭ adpačynku respandenty adznačyli adpačynak na pryrodzie (61,2%), adpačynak na plažy, rybałku (37,4%), naviedvańnie histaryčnych pomnikaŭ, muziejaŭ, vystavak (27,6%).
Najbolš pierśpiektyŭnymi vidami ŭnutranaha turyzmu biełarusy ličać lačebna-azdaraŭlenčy, spartyŭny, ahrarny, ekaturyzm, vajskova-histaryčny turyzm. Darečy, paśla pačatku poŭnamaštabnaj vajny va Ukrainie kolkaść respandentaŭ, jakija abrali apošni varyjant, źmienšyłasia prykładna na 9%.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary