Žychara Navapołacka pakarali aryštam za rasklejku antyvajennych ulotak z vyjavaj Pucina. Raniej jaho vinavacili ŭ inšym
Sudździa suda horada Navapołacka Zinaida Bałabołava 11 lipienia za praviedzieny biez dazvołu ŭładaŭ pikiet pastanaviła aryštavać na 15 sutak miechanika ŭstanoŭki AAT «Naftan» Ilju Dvojryna. Adnak na sudovaje pasiedžańnie mužčyna nie źjaviŭsia, a zavočna vinu pryznaŭ, chadajničajučy ab razhladzie administracyjnaj spravy ŭ jaho adsutnaść, piša «Viciebskaja viasna».
U sudzie byŭ ahučany źmiest pratakoła ab administracyjnym pravaparušeńni, składzieny ŭ miascovym adździaleńni ŭ milicyi, u jakim «pravaparušalnik» raspavioŭ pra toje, što jon uviesnu 2023 hoda vyrabiŭ ulotki z vyjavaj prezidenta Rasii Uładzimira Pucina i tekstam antyvajennaha charaktaru, i 16 traŭnia raskleiŭ ich na prypynku hramadskaha transpartu ŭ Navapołacku.
Tym samym, na dumku sudździ Bałabołavaj, Ilja Dvojryn biez adpaviednaha dazvołu Navapołackaha harvykankama pravioŭ «niesankcyjanavanaje pikietavańnie, vykazvajučy hramadska-palityčnyja, asabistyja i inšyja intaresy, šlacham raźmiaščeńnia ŭlotki z vyjavaj Prezidenta Rasijskaj Fiederacyi Pucina U. U. i tekstam na palityčnuju tematyku».
Tamu na padstavie č. 1 art. 24.23 KaAP Bałabołava prysudziła Dvojryna da administracyjnaha spahnańnia ŭ vyhladzie aryštu terminam na piatnaccać sutak, a termin adbyćcia aryštu treba budzie vyličvać z daty jaho faktyčnaha zatrymańnia.
Raniej paviedamlałasia, što 53-hadovaha Ilju Dvojryna zatrymali za nibyta ablićcio farbaj mašyny prarasijskaha aktyvista Siarhieja Judajeva. Incydent z ablitym farbaj aŭtamabilem na krymskich numarach adbyŭsia ŭ Navapołacku 1 lipienia.
Tady paviedamlałasia, što akramia samoha Ilji Dvojryna byli zatrymanyja syn Dvojryna Dźmitryj, niaviestka i brat. 4 lipienia ŭ ich doma praviali pieratrusy, a svajakoŭ advieźli ŭ RAUS. Paźniej žonku i brata Ilji paśla pravierki telefonaŭ adpuścili, a jaho samoha źmiaścili ŭ viciebski IČU. Na jaho nibyta była zaviedziena kryminalnaja sprava.
Dzie Ilja Dvojryn znachodzicca ciapier, nie paviedamlajecca.
Jak biełarusy ŭ Vilni adznačyli Dzień Voli ŠMAT FOTA4
Jak biełarusy ŭ Vilni adznačyli Dzień Voli ŠMAT FOTA
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary