Žychara Mahilova, jaki pavieryŭ abiacańniam siłavikoŭ i viarnuŭsia z Polščy damoŭ, asudzili na try hady kałonii
Alaksandra Kulikova zatrymali adrazu paśla viartańnia z-za miažy. Mužčynu abvinavacili ŭ abrazie Alaksandra Łukašenki i paklopie na jaho.
Padstavaj dla kryminalnaj spravy stali kamientary ŭ adnym z čataŭ, pryznanych siłavikami ekstremisckimi materyjałami ŭ mai 2021 hoda.
Ale pierad hetym, 6 krasavika, na Kulikova skłali administracyjny pratakoł pa art.19.11 KaAP (Vyrab, raspaŭsiud i (albo) zachoŭvańnie ekstremisckich materyjałaŭ) i prysudzili administracyjny aryšt.
Jak paviedamili znajomyja Alaksandra, jakija znachodziacca za miažoj, u mai 2023 hoda, užo paśla ŭzbudžeńnia kryminalnaj spravy, jon vyjechaŭ u Polšču, dzie prabyŭ kala miesiaca, piša MAYDAY.TEAM.
Zatym, kali vieryć słovam krynic, jamu patelefanavała sastarełaja maci, jakaja paviedamiła, što joj telefanavaŭ śledčy i pahražaŭ vyšukam syna.
Było abiacana, što kali Kulikoŭ vierniecca, to jamu budzie abranaja miera pakarańnia, nie źviazanaja z pazbaŭleńniem voli.
Praź niejki čas Kulikoŭ vyrašyŭ viarnucca ŭ Biełaruś i byŭ zatrymany. Na suviaź jon pierastaŭ vychodzić padčas pierasiačeńnia miažy.
Na jaho skłali jašče adzin pratakoł ab administracyjnym parušeńni (art. 19.11 KaAP) i ŭzbudzili kryminalnuju spravu.
Sud Leninskaha rajona Mahilova pryznaŭ mahiloŭca vinavatym i asudziŭ da troch hadoŭ pazbaŭleńnia voli z nakiravańniem u kałoniju va ŭmovach ahulnaha režymu.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1212
Kamientary