Rasijskaja stancyja, zapuščanaja na Miesiac, raźbiłasia ab jaho pavierchniu i spyniła isnavańnie
Pry pierachodzie aŭtamatyčnaj mižpłanietnaj stancyi «Łuna-25» na pieradpasadačnuju arbitu adbyłasia niaštatnaja situacyja, paviedamili ŭ Raskosmasie.
«U adpaviednaści z prahramaj palotu ŭ 14:10 byŭ vydadzieny impuls dla pierachodu stancyi na pieradpasadačnuju arbitu. U čas vykanańnia apieracyi na borcie aŭtamatyčnaj stancyi adbyłasia niaštatnaja situacyja, jakaja nie dazvoliła vykanać manieŭr z zadadzienymi paramietrami», — paviedamiła pres-słužba Raskosmasa.
Paźniej Raskosmas pryznaŭ: «Realizavanyja 19 i 20 žniŭnia mierapryjemstvy pa pošuku aparata i ŭvachodžańni ź im u suviaź vynikaŭ nie dali. Pa vynikach papiaredniaha analizu, u suviazi z adchileńniem faktyčnych paramietraŭ impulsu ad raźlikovych, aparat pierajšoŭ na nieraźličanuju arbitu i spyniŭ svajo isnavańnie ŭ vyniku sutyknieńnia z pavierchniaj Miesiaca», — havorycca ŭ paviedamleńni ad 20 žniŭnia.
Stancyja «Łuna-25» pavinna była sieści ŭ rajonie paŭdniovaha polusa Miesiaca, na poŭnač ad kratara Bahusłaŭski 21 žniŭnia. U vypadku pośpiechu aparat musiŭ prapracavać na spadarožniku Ziamli adzin hod. Asnoŭnymi zadačami misii vyznačalisia adpracoŭka technałohij miakkaj pasadki, daśledavańnie ŭnutranaj budovy i raźviedka resursaŭ, u tym liku vady.
Rakieta-nośbit «Sajuz-2.1b» ź miesiacovaj stancyjaj «Łuna-25» startavała z kasmadroma Uschodni ŭ Amurskaj vobłaści nočču 11 žniŭnia. Praź piać dzion jana vyjšła na arbitu štučnaha spadarožnika Miesiaca.
Aŭtamatyčnaja stancyja «Łuna-25» — pieršaja ŭ sučasnaj historyi Rasii miesiacovaja misija. Papiaredniaja stancyja «Łuna-24» była zapuščanaja ŭ 1976 hodzie Savieckim Sajuzam i dastaviła na Ziamlu 170 h miesiacovaha hruntu.
Foty z Maskvy dajuć pabačyć Pucina i Łukašenku biez hrymu14
Kamientary