Prablemy sa stravavańniem mohuć sihnalizavać ab nabližeńni chvaroby Parkinsana — vučonyja
Vyniki apošnich daśledavańniaŭ pakazvajuć, što bolš vysokaja ryzyka zachvareć na chvarobu Parkinsana ŭ tych, chto maje prablemy kišečnika.
Jak pakazała daśledavańnie, vyniki jakoha apublikavanyja ŭ interniet-časopisie Brytanskaha tavarystva hastraenterołahaŭ Gut, zapor, hastraparez, dysfahija pakazali śpiecyfičnuju suviaź z chvarobaj Parkinsana.
Navukoŭcy adznačajuć, što raniejšyja daśledavańni vyjavili ŭzajemasuviaź pamiž zachvorvańniami straŭnikava-kišačnaha traktu z chvarobaj Alchiejmiera, insultam i anieŭryzmaj hałaŭnoha mozhu. U svaim daśledavańni jany chacieli pravieryć hipotezu ab tym, što takaja ž uzajemasuviaź isnuje i ŭ vypadku chvaroby Parkinsana.
Daśledčyki paraŭnali miedycynskija zapisy 24624 čałaviek u ZŠA z chvarobaj Parkinsana, 19046 čałaviek z chvarobaj Alchiejmiera i 23942 čałaviek z cerebravaskularnymi zachvorvańniami (insult, anieŭryzma i inšyja).
Pacyjentaŭ z chvarobaj Parkinsana paraŭnoŭvali z pacyjentami ź inšych hrup pa ŭzrostu, połu, rasie i etničnaj prynaležnaści, a taksama praciahłaści dyjahnazu. Za asnovu paraŭnańnia brałasia častata straŭnikava-kišačnych zachvorvańniaŭ za šeść hadoŭ da pastanoŭki dyjahnazu.
Jany taksama paraŭnali miedycynskija zapisy ŭsich udzielnikaŭ daśledavańnia, u jakich było dyjahnastavana luboje z 18 zachvorvańniaŭ kišečnika, z tymi, u kaho nie było kankretnaha zachvorvańnia na praciahu piaci hadoŭ, kab ubačyć, u kolkich ź ich raźviłasia chvaroba Parkinsana ci inšyja nieŭrałahičnyja rasstrojstvy.
Abodva paraŭnańnia vyjavili bolš vysokuju ryzyku dyjahnazu chvaroby Parkinsana ŭ pacyjentaŭ z prablemami kišečnika. U asob z zaporami, ciažkaściami hłytańnia (dysfahijaj) i hastraparezam, pry jakim ježy patrabujecca bolš času dla pieramiaščeńnia sa straŭnika ŭ tonkuju kišku, imaviernaść raźvićcia chvaroby Parkinsana na praciahu piaci hadoŭ da pastanoŭki dyjahnazu była bolš čym u dva razy vyšejšaj. Sindrom razdražnionaha kišečnika biez dyjarei pavialičvaŭ ryzyku na 17%.
Było vyjaŭlena, što funkcyjanalnaja dyśpiepsija (adčuvańnie piakotki ci pierapaŭnieńnia straŭnika bieź vidavočnaj pryčyny), sindrom razdražnionaha kišečnika z dyjarejaj, dyjareja i nietrymańnie kała taksama čaściej sustrakajucca siarod pacyjentaŭ, u jakich raźviłasia chvaroba Parkinsana. Ale ich nielha ličyć śpiecyfičnymi tolki dla hetaj hrupy ludziej, bo takija ž zachvorvańni taksama byli bolš raspaŭsiudžanyja ŭ pacyjentaŭ, jakija paźniej mieli chvarobu Alchiejmiera, anieŭryzmu ci insult.
Tym nie mienš, jak pakazała daśledavańnie, inšyja prablemy z kišečnikam, takija, jak jaho zapalenčyja zachvorvańni, nie pavialičvajuć imaviernaść raźvićcia chvaroby Parkinsana. Imaviernaść raźvićcia chvaroby Parkinsana była nižejšaj i ŭ pacyjentaŭ, jakim vydalili apiendyks.
Navukoŭcy adznačajuć, što vyniki daśledavańnia «patrabujuć pilnaści» adnosna prablem z kišečnikam u pacyjentaŭ, jakija majuć pavyšanuju ryzyku zachvorvańnia chvarobaj Parkinsana. Razumieńnie taho, jak i čamu prablemy z kišečnikam uźnikajuć na rańnich stadyjach chvaroby Parkinsana, moža palepšyć simptomy i navat zapavolić ci spynić prahres zachvorvańnia šlacham rańniaha vyjaŭleńnie i lačeńnia chvarobaŭ kišečnika.
Čytajcie jašče:
Što možna zrabić, kab palepšyć zdaroŭje kišečnika
Jak miljardy mikraarhanizmaŭ u kišečniku mohuć umacavać vaša psichičnaje zdaroŭje
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ12
Kamientary