Jahor Marcinovič pra sustreču ź Ivulinym: Jak ja vyciahnuŭ ščaślivy łatarejny bilet u SIZA

«Kali vy choć raz hladzieli rasijskija filmy-sieryjały 1990-ch, to musicie mieć stereatypnaje ŭsprymańnie pra postsavieckija turmy. Novy čałaviek zachodzić u kamieru i bačyć pierad saboj surovych mužykoŭ u trusialach-šortach i ŭ majkach-ałkahaličkach. Kaniečnie, usie brytyja nałysa i ŭ nakołkach). Moža, i mif, ale ŭ pamiaci adkłaŭsia tryvała.

I voś traplaju ja ŭ lipieni 2021 hoda na Vaładarku. Viaduć pa biaskoncych kalidorach, zavodziać narešcie ŭ kamieru — №60, Šanchaj — i što ja baču? Surovych łysych mužykoŭ u ałkahaličkach!) I tut adzin ź ich padychodzić: «O, Jahor, rady ciabie bačyć!» Hladžu na jaho vyłuplenymi vačyma. U mianie adna dumka: «Chto ty, zečara???» 

Jon uśmichajecca: «Sania Ivulin!» A-a-a!!! Heta ž samaje vialikaje z usich mahčymych šancavańniaŭ! Jasna, što palityčnych šmat, usio adno z kimści pierasiačešsia. Dyj ludziej ź miedyjaśfiery ŭ SIZA niamała. Ale Sančas — heta prosta idealnaje traplańnie ŭ jabłyčak dla mianie. Pryblizna toje samaje pakaleńnie, padobnyja kaštoŭnaści i intaresy. Tamu možna pahavaryć i pra pracu, i pra futboł, i abmierkavać ahulnych znajomych. I ŭ šachmaty parubicca, i ŭ nardy. I navat u prabiežkach pa turemnym dvoryku da jaho dałučyŭsia, choć na svaim amatarskim uzroŭni).

Karaciej, šaniec sustrecca mienavita ź Ivulinym — sapraŭdy adzin na 100. I ja vyciahnuŭ hety łatarejny bilet). 

Ale samaje hałoŭnaje — pazityŭny pohlad Sani na žyćcio. Heta ž takaja štuka, jakaja padpitvaje i samoha aptymista, i ludziej navokał. My ź im byli ŭ hetym padobnyja, tamu ŭ kamiery ŭzvodzili aptymizm u kvadrat.

Voś tak na pazityvie my i praviali ź im try z pałovaj miesiacy, pakul mianie nie pieraviali. I heta nasamreč samy kruty susied za dva hady źniavoleńnia!) Padsumoŭvaju: siabroŭstva z Sančasam — adna z samych vialikich znachodak za apošnija dva hady. I toje, što atrymałasia biez prablem vynieści z saboj).

Vy ž pahadžajeciesia, što Sania miehakruty?)» — napisaŭ Jahor Marcinovič.

***

Žurnalista Jahora Marcinoviča zatrymali 8 lipienia 2021 hoda. Jamu i Andreju Skurko prysudzili 2,5 hoda źniavoleńnia. Termin jany adbyli całkam. Jahor Marcinovič znachodziŭsia ŭ babrujskaj kałonii.

18 žniŭnia, całkam adbyŭšy prysudžanyja 2 z pałovaj hady źniavoleńnia, z mahiloŭskaj kałonii vyzvaliŭsia Andrej Skurko.

***

Alaksandr Ivulin byŭ zatrymany 3 červienia 2021 hoda i pieršapačatkova asudžany pa administracyjnaj spravie na 30 sutak. Ale z Akreścina tak i nie vyjšaŭ, a byŭ adpraŭleny na Vaładarku, suprać jaho była zaviedziena kryminalnaja sprava pavodle narodnaha artykuła 342. U studzieni 2022 hoda byŭ asudžany na dva hady kałonii. 17 lutaha 2023 hoda vyjšaŭ na volu z kałonii.

• 30
• 0
• 1
• 0
• 4
• 2
• 3
• 0