U Dahiestanie prachodziać pratesty pad antysiemickimi łozunhami, pahromščyki ŭvarvalisia ŭ aeraport
Dziasiatki ludziej, pratestujučy suprać prylotu rejsa z Tel-Aviva ŭ Dahiestan, bieśpieraškodna ŭvajšli ŭ budynak terminała aeraporta Machačkały. Pra heta paviedamlajuć miascovyja telehram-kanały.
Na kadrach bačnyja supracoŭniki siłavych słužbaŭ, jakija nie akazvajuć supracivu. Na inšym videa bačna, jak pratestoŭcy praryvajucca na terytoryju aeradroma.
Ludzi sabralisia ŭ aeraporcie na zakliki papularnych u respublicy telehram-kanałaŭ. Učora jany zaklikali šukać habrejaŭ u hatelach Dahiestana, bo, maŭlaŭ, «pavodle našaj infarmacyi, tam šmat uciekačoŭ ź Izraila».
Machačkalinskaja palicyja zapeŭnivaje natoŭp, što padzialaje jahonyja pačućci, ale zaklikaje nie ładzić pahromaŭ:
«My vydatna razumiejem vaš stan. Davajcie źbiaremsia ŭsie razam, i my z vami ŭstaniem i budziem skandavać tut, kali łaska, niama pytańniaŭ. […] Vy ž zakon parušajecie, słuchajcie, navošta vy heta robicie?»
U natoŭpie čuvać kryki «Śmierć jachudam!» (judejam). Natoŭp prarvaŭsia nie tolki ŭ budynak aeraporta, ale i na lotnaje pole, habrejaŭ šukajuć navat u samalotach.
Kanał «Utro Dahiestan» raspaŭsiudziŭ videa z aeraporta, na jakim pratestoŭcy patrabujuć ad mužčyny, jakoha jany pryniali za habreja, «praklonaŭ na kamieru śmiardziučamu Izrailu».
Aeraport u Machačkale z-za biesparadkaŭ zakryli, u niebie nad im kružać rejsy ź Nižnievartaŭska i Maskvy. Nie vyklučajecca, što hetyja samaloty buduć pierapraŭlacca ŭ aeraporty susiednich respublik.
Nahadajem, što mienavita telehram-kanał «Utro Dahiestan» byŭ asnoŭnym arhanizataram pratestaŭ suprać abjaŭlenaj rasijskimi ŭładami mabilizacyi vosieńniu minułaha hoda. Dahiestan staŭ adnoj z tych miascovaściaŭ, dzie hetyja pratesty stali dastatkova zaŭvažnymi.
Ciapier u Dahiestanie i inšych respublikach rasijskaha Paŭnočnaha Kaŭkaza pratesty prachodziać z musulmanskaj salidarnaści, miascovyja žychary takim čynam padtrymlivajuć ruch CHAMAS u jaho zmahańni ź Izrailem.
Kamientary