Słavutaha ksiandza Hienrycha Akałatoviča zatrymali. Mahčyma, vinavaciać u «zdradzie radzimie»
Pra zatrymańnie probašča kaścioła Śviatoha Juzafa ŭ Vałožynie Hienrycha Akałatoviča stała viadoma ŭčora.
Krynicy «Chryścijanskaj vizii» śćviardžajuć, što zatrymańnie adbyvałasia ŭ miežach kryminalnaj spravy pa č.1 art. 356 KK RB «Zdrada dziaržavie». Sankcyja pa dadzienym artykule praduhledžvaje ad siami da piatnaccaci hadoŭ pazbaŭleńnia voli.
Śviataru 63 hady, jon pieranios infarkt i niadaŭna jamu była zroblena apieracyja na straŭniku ŭ suviazi z ankałahičnym zachvorvańniem.
U 2013 hodzie pa hetym ža artykule, «Zdrada dziaržavie» abvinavačvaŭsia inšy katalicki śviatar, ksiondz Uładzisłaŭ Łazar. Jon byŭ zatrymany ŭletku 2013 hoda i paŭhoda pravioŭ u SIZA KDB. Paśla śviatara vypuścili i sprava nie mieła dalejšaha praciahu. Paśla vyzvaleńnia ź SIZA słužyć u Vilejcy.
Hienrych Akałatovič naradziŭsia ŭ Novaj Myšy pad Baranavičami ŭ 1960 hodzie ŭ polskaj pa śviadomaści siamji.
Ën pryjšoŭ da śviatarstva jašče ŭ časy savieckaha ateizmu. Ën jašče junakom vučyŭsia ŭ padpolnaj sieminaryi ŭ Niadźviedcy pad Lachavičami. Adsłužyŭ u armii, vyvučyŭsia na čyhunačnika, ale praciahvaŭ dabivacca ad uładaŭ prava na aficyjnaje navučańnie ŭ sieminaryi. Vyśviaciŭ jaho tajemna biskup Vincentas Sładkiavičus u 1984 hodzie.
Hienrych Akałatovič słužyŭ probaščam u Brasłavie, Rakavie, Niaśvižy, Babrujsku. Ën byŭ pieršym ksiandzom, jaki naviedaŭ Katyń. Heta było ŭ 1984 hodzie, ułady jaho za heta tam zatrymali i aštrafavali. Usiaho Saviety štrafavali jaho kala 30 razoŭ. Jaho rodny brat Leanard taksama ksiondz.
Kamientary