Butelka pitnoj vady za sotni dalaraŭ — novy trend siarod bahatych. Za što jany płaciać?
Ci čuli vy pra restarany, dzie zamiest vytančanaha vina prapanujuć elitnuju vadu? Takaja vada abiacaje našmat bolš, čym zvyčajnaja minieralnaja abo vodapravodnaja — jana taksama moža pazbavić vas sotniaŭ dalaraŭ.
Vada premium-kłasa, abo rafinavanaja vada, pastupaje z pryrodnych krynic, takich jak vułkaničnyja parody, ledaviki abo kropli tumanu. Časam jaje zdabyvajuć prama z abłokaŭ, piša BBC.
Ci jość u vady smak?
Jak i pry dehustacyi vinaŭ, jość vodnyja samielje, jakija aceńvajuć kožny pradukt na asnovie jaho minieralnaha składu, smaku i adčuvańniaŭ u rocie.
«Vada — heta nie prosta vada. Kožnaja vada adroźnivajecca i maje smak», — kaža Milin Patel, kansultant pa vodach, jaki kiruje nievialikaj kramaj u Łondanie.
Jon pravodzić dehustacyi dla ludziej, zacikaŭlenych u vyvučeńni vady. Patel skazaŭ Bi-bi-si, što jon biare na siabie misiju pa infarmavańni ludziej, asabliva maładoha pakaleńnia, ab roznych vidach vady i ich smakach.
«Pamiatajecie, u škole my vyvučali naturalny hidrałahičny cykł — vypareńnie, kandensacyju i apadki. Adnak my prapuścili adzin momant — reminieralizacyju», — kaža jon.
«Takim čynam, kali doždž padaje na ziamlu, jana ŭbiraje vadu, a potym hetaja vada prasočvajecca praz roznyja parody i hleby, napaŭniajučysia takimi minierałami, jak kalcyj, mahnij, kalij, dyjaksid kremniju i inšymi. Voś dzie vada nabyvaje svoj minieralny smak», — dadaje Patel.
Vada z takich krynic, jak ajśbierhi abo daždžy, jakija nie prasočvajucca naturalnym šlacham praź ziamlu, zvyčajna maje mienšy ŭzrovień ćviordych rečyvaŭ u paraŭnańni z vadoj z krynic i kałodziežaŭ.
Patel maje kalekcyju raznastajnaj vady z usiaho śvietu, ad vady z-pad krana da vysakajakasnaj vady, jakaja kaštuje bolš za 300 dalaraŭ za butelku.
«My dajem ludziam mahčymaść bačyć u vadzie niešta inšaje, čym vadkaść biez smaku. Kali vy pačynajecie daśledavać vadu i śviadoma jaje pić, vy možacie być ździŭleny, kolki słoŭ možna vykarystoŭvać, kab apisać jaje», — kaža Patel.
«Ludzi vykarystoŭvajuć takija słovy, jak «miakki», «nasyčany», «kazytlivy», «aksamitny», «horki», a časam i «kisły». Ja nazyvaju heta smakam vady».
Konkurs dehustacyi vady
Tavarystva dobraj vady źbirajecca kožny hod, abjadnoŭvajučy vytvorcaŭ jakasnaj vady z usiaho śvietu — ad Butana da Ekvadora – i pravodziačy mižnarodnyja dehustacyjnyja spabornictvy.
Bolšaść udzielnikaŭ štohadovaha samitu — pradstaŭniki siamiejnych pradpryjemstvaŭ, jakija zdabyvajuć vadu ŭ addalenych rajonach.
«Spačatku dehustacyja vady ličyłasia śmiešnaj idejaj», — kaža doktar Majkł Maša, suzasnavalnik Fine Water Society i Fine Water Academy.
«Ja pačaŭ heta rabić kala 20 hadoŭ tamu, kali mnie pryjšłosia kinuć pić ałkahol», — raspaviadaje jon BBC.
«Kali vino raptoŭna prybrali, ja azirnuŭsia vakoł stała i raptam źjaviłasia jašče adna butelka, jakuju ja raniej nie bačyŭ — vada. Ja padumaŭ, što, mahčyma, ja moh by vykarystać svaju cikaŭnaść nie tolki da vina, ale i da vady», — skazaŭ jon.
Rafinavanaja vada nie tolki zdavalniaje smahu, ličyć jon. Heta mahčymaść daśledavać, dzialicca i atrymlivać asałodu ad čahości asablivaha.
Raście popyt na čystuju vadu, kaža doktar Maša, i jon ličyć, što heta źviazana z žadańniem mienš užyvać ałkahol i hazavanyja biezałkaholnyja napoi, asabliva siarod maładoha pakaleńnia, bolš schilnaha da zdarovaha ładu žyćcia.
Vada i ježa
Niekatoryja restarany ŭ Ispanii ci ZŠA prapanujuć vadu ŭ mieniu ź niekatorymi stravami.
«Ciapier ja stvaraju vodnaje mieniu dla trochzorkavaha restarana Michelin u ZŠA. My płanujem pradstavić ad 12 da 15 staranna adabranych vidaŭ vady, kab dapoŭnić ježu i atmaśfieru», — kaža doktar Maša.
«Da ryby vam padaduć inšuju vadu, čym da bifšteksu. Jana pavinna mieć mienšuju minieralnaść, kab nie pierabivać smak ryby».
Taksama doktar Maša pracuje nad prajektami elitnych damoŭ i kvater, dzie zamiest vinnych sklepaŭ buduć «pakoi z vadoj».
Doktar Maša adznačaje, što pitnaja vada taksama papularnaja siarod kultur, jakija admaŭlajucca ad ałkaholu pa relihijnych pryčynach, u pieršuju čarhu na viasiellach. Heta taksama vydatny alternatyŭny padarunak, kab zamianić darahoje šampanskaje, śćviardžaje jon.
Kamientary