Homielskija ideołahi vypadkova apublikavali słužbovuju instrukcyju i pračynili fortku ŭ miascovuju prapahandysckuju kuchniu
Ideołahi administracyi Savieckaha rajona Homiela vypadkova apublikavali słužbovuju instrukcyju, jakuju im dasłali z adździeła infarmacyjna-analityčnaj raboty i manitorynhu Kamiteta ideałahičnaj raboty i pa spravach moładzi Homielskaha abłvykankama. Paviedamleńnie na kanale «SOVIETskij Live» zaŭvažyŭ «Fłahštok» i daviedaŭsia, što moža aznačać instrukcyja.
U paviedamleńni havorycca pra toje, što ideołaham dasłali list pad hryfam «dla słužbovaha karystańnia» z zadańniem paznačyć IP-adrasy, ź jakich padklučajucca da internetu śpiecyjalisty adździełaŭ pa infarmacyjna-analityčnaj rabocie.
Isnavańnie takich adździełaŭ i siektaraŭ nie afišujecca — infarmacyi pra ich niama na sajtach rajonnych administracyj, jak i pra isnavańnie takoha nakirunku raboty ŭ abłasnym kamitecie ideałohii. Pra dziejnaść takich adździełaŭ viadoma tolki praz uskosnyja ŭzhadki ŭ publikacyjach dziaržaŭnaj presy.
Raniej «Fłahštok» vyśvietliŭ, što načalnikam adździeła infarmacyjna-analityčnaj raboty i manitorynhu kamiteta ideałahičnaj raboty i pa spravach moładzi Homielskaha abłvykankama źjaŭlajecca Dźmitryj Isačanka, jaki kantraluje treš-kanał «Hovorit Homiel» i chavajecca pad nikam Hejter.
Ciapier stała viadoma, što jon nie vydalaŭ svoj słužbovy akaŭnt, a tolki pamianiaŭ nik na «Tutejšy». Mienavita pad im Isačanka pierapisvajecca ź inšymi ideołahami. Pra heta havoryć infarmacyja z telehram-bota, jaki fiksuje staryja danyja telehram-akaŭntaŭ.
U dasłanaj Isačankam instrukcyi, mierkavana, viadziecca havorka pra stvareńnie łakalnaj sietki — heta moža być servis pierasyłki dakumientaŭ ci kamunikacyi čynoŭnikaŭ.
Ź lista taksama vynikaje, što padnačalenym Isačanki ŭ jahonym sakretnym adździele źjaŭlajecca Jaŭhien Uściuškoŭ. Heta były beerseemaviec, jaki, pavodle raniejšych uzhadak pra jaho, dahetul pracavaŭ hałoŭnym śpiecyjalistam adździeła infarmacyjna-analityčnaj i arhanizacyjna-kadravaj raboty Homielskaha abkama BRSM jak minimum z 2019 hoda pa 2021.
Taksama dziakujučy infarmacyi pra akaŭnt Isačanki možna mierkavać, čym zajmajucca takoha kštałtu śpiecyjalisty. «Tutejšy» źjaŭlajecca ŭdzielnikam mnohich čataŭ, dzie abmiarkoŭvajuć hramadskija prablemy, pratesnych čataŭ, u tym liku supolnaściaŭ biełarusaŭ za miažoj. Akramia taho, ideołah padpisany na supołku dapamohi tym, chto šukaje ŭkraincaŭ, vyviezienych u Biełaruś.
Cikava, što jašče adzin były beeresemaviec Alaksiej Zajcaŭ, jaki pracavaŭ pieršym sakratarom Centralnaha rajonnaha kamiteta BRSM Homiela, ciapier pracuje zahadčykam siektara infarmacyjna-analityčnaj raboty ŭpraŭleńnia ideałahičnaj raboty, kultury i pa spravach moładzi Homielskaha harvykankama. Takim čynam, kadry «ideołahaŭ-analitykaŭ» farmujuć, jak praviła, z beerseemaŭcaŭ.
«U nas nie hnutkaja, umoŭna zakonnaja sistema prazachodnich talerastaŭ!» Homielski čynoŭnik prakamientavaŭ marš rasijskich fanataŭ
Homielski pravakatar zajaviŭ, što aštrafavany za «ekstremizm», ciapier u vyšuku i choča pierajści na biełaruskuju movu
Homielskich školnikaŭ prymusiać šukać hieraičnaje minułaje ŭ Afhanskaj vajnie. Ciapier ideołahi nazvali jaje «śpiecapieracyjaj»
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła7
Kamientary