U krainach Bałtyi zatrymali 11 čałaviek pa padazreńni ŭ pracy na rasijskija śpiecsłužby
Śpiecsłužby Łatvii i Estonii praviali šerah zatrymańniaŭ asob, jakija padazrajucca ŭ vandaliźmie i apahanieńni pomnikaŭ. Ich dziejańni kłasifikujucca jak «hibrydnyja ataki na zamovu rasijskich śpiecsłužbaŭ», piša Ruskaja słužba Bi-bi-si.
Usie 11 zatrymanych čałaviek padazrajucca bałtyjskimi śpiecsłužbami ŭ zbory adčuvalnaj infarmacyi, padrychtoŭcy i arhanizacyi dyviersij.
Pavodle viersii estonskaj Słužby ŭnutranaj biaśpieki, u kožnaha padazravanaha była svaja rola ŭ padrychtoŭcy i praviadzieńni apieracyj, ich dziejańni kaardynavalisia Maskvoj. Viarboŭka, vierahodna, prachodziła praz sacsietki.
U jakaści prykładaŭ hibrydnych napadaŭ estonskaja SUB zhadvaje raźbityja vokny ŭ dźviuch mašynach — ministra i žurnalista. Estonskija ŚMI pišuć pra mašyny ministra ŭnutranych spraŭ Łaŭry Laeniemietsa i redaktara partała Delfi Andreja Šumakova. U svaju čarhu, łatvijskaja słužba dziaržbiaśpieki paviedamlaje pra apahanieńnie pomnika łatyšskim lehijanieram.
Na hety momant abiedźvie spravy znachodziacca na stadyi rasśledavańnia, da siami asob u jakaści miery strymańnia ŭžyty aryšt, paviedamlaje Bi-bi-si.
Kiraŭnik estonskaj SUB Marha Pałasan ličyć, što dziejańni rasijskich śpiecsłužbaŭ u hetym kantekście nakiravanyja na destabilizacyju abstanoŭki i nahniatańnie strachu. Ź jahonych słoŭ, hatoŭnaść estonskaha hramadstva da supracoŭnictva z Kramlom vielmi nizkaja. Bolš za toje, ludzi aktyŭna paviedamlajuć miascovym śpiecsłužbam pra padazronyja paviedamleńni ŭ sacsietkach.
Jak paviedamlaje estonskaja SUB, pieršyja zatrymańni prajšli ŭ śniežni 2023 hoda, zatym — u pačatku lutaha, potym — u siaredzinie lutaha. Usiaho tak było zatrymana dziesiać čałaviek. Jašče adno zatrymańnie praviała łatvijskaja SDB u pačatku lutaha.
Abiedźvie arhanizacyi paviedamili pra zatrymańni i pieratrusy ŭviečary 20 lutaha.
Kamientary