Jadnacca treba sa svaimi

Apošnim časam na našu frontaŭskuju e-po [elektronnuju poštu] i na majo imia pačaścilisia listy maładych biełarusaŭ, jakija chočuć daviedacca, što stałasia z Narodnym Frontam, čamu raskałoŭsia, čamu zmaleła jahonaja siła i palityčnyja ŭpłyvy. Šmat kaho biantežyć rezkaja krytyka z našaha boku ciapierašniaj «kaalicyjnaj apazycyi» i krytyčnyja acenki dziejańniaŭ jaje ŭdzielnikaŭ i asobaŭ. Voś typovyja pytańni:

«Ja vielmi prašu Vas patłumačyć, čamu Vy ŭvažajecie Partyju BNF za prarasiejskuju apazycyju?»

«U majoj hałavie nie ŭkładajecca, što sp. Vincuk zdolny śviadoma vykarystoŭvać nas usich ułučna ź jahonym synam dziela dasiahnieńnia prarasiejskich metaŭ.» (Juraś Vićbič)

Pastarajusia adkazać koratka pra hałoŭnaje, bo na hetu temu i mnoj, i siabrami Frontu ŭžo dastatkova šmat napisana ŭ adradženskim druku. Praŭda, ŭličvaju abstaviny, što nia kožnamu hety druk dastupny.

* * *

Nichto nie sumniavajecca, što V. Viačorka za Biełaruś, za niezaležnaść, movu i h.d. i nichto nia ličyć jaho «prarasiejskim», «ahientam» i t. p. Tolki treba pamiatać, što palityka maje svaje zakony i praviły i kali ich ihnaravać, to dobrymi pažadańniami u takim vypadku možna vymaścić darohu ŭ piekła. Japonija nie była fašystoŭskaj krainaj, ale dziela svaich intaresaŭ pajšła na chaŭrus z Hitleram. U vyniku na Japoniju pasypalisia atamnyja bomby i kraina straciła svaje terytoryi.

Adkołataja častka Frontu, zmahajučysia suprać Łukašenki, pajšła na chaŭrus z pramaskoŭskimi partyjami i navat z kamunistami, dumajučy, mahčyma, pašyryć na ich svoj nacyjanalny upłyŭ, ale nie razumiejučy, što paddalisia čužoj palitycy. U vyniku pramaskoŭskija partyi zdaminavali tak zvanuju apazycyju, a frontaŭcy ź Viačorkam apynulisia na trecich rolach; vierchavodziać Kalakin, Labiedźka, Buchvostaŭ, usiudy havorać i pišuć pa-rusku, jeździać u Maskvu da Karahanava dy Markava dy Niamcova, vybivajuć prychilnaść i čužyja srodki, ulahajuć čužoj palitycy, i Viačorka ŭ hetaj kampanii jak šerahoviec.

Usio heta abaznačaje paŭzučuju parazu biełaruskaj nacyjanalnaj idei (idei, na jakoj trymajecca nacyjanalnaja dziaržava i nacyja). U hetym i sutnaść zdrady. Nie stali zmahacca za biełaruskuju spravu, jak našyja adradžency dziady-pradziady, jak Narodny Front suprać kamunizmu, SSSR dy KPSS, a paddalisia chaŭruśnikam dziela chaŭrusu, dziela abiacanych prahmatyčnych intaresaŭ, achviaravalisia vialikim dziela małoha.

U vyniku na siońniašni dzień Biełaruś, faktyčna, apynułasia biez nacyjanalnaj palityčnaj alternatyvy. Kali b ciapier raptam abvaliŭsia režym Łukašenki, to da ŭłady ŭ Biełarusi (pry dapamozie Maskvy, kalakinych i labiedziek) pryjšli b znoŭ antybiełaruskija siły. Dziesiać hadoŭ tamu, kali ŭ biełaruskaj apazycyi i palitycy daminavaŭ Biełaruski Narodny Front «Adradžeńnie», takoha nikoli b nia zdaryłasia. U Biełarusi była nacyjanalnaja palityčnaja perspektyva.

Pra ŭsio heta ja kazaŭ, pisaŭ i papiaredžvaŭ i siem, i vosiem, i dziesiać hadoŭ tamu. Harantyja palityčnaj pieramohi nie ŭ farmavańni kaalicyjaŭ z apanentami dziela dasiahnieńnia blizkich metaŭ, a ŭ stvareńni mocnaj palityčnaj biełaruskaj siły, jakaja budzie hruntam stratehičnych dasiahnieńniaŭ nacyjanalnaj palityki. Nichto nia moža skazać, što ničoha nia viedaŭ i nia čuŭ, kali paŭstanie pytańnie ab adkaznaści. Jość kankretnyja vinavajcy ŭ razhromie Japonii. Ciapierašniaja zadača ŭsioj našaj biełaruskaj supolnaści – viarnuć Biełarusi nacyjanalnuju palityčnuju perspektyvu, kab mieć budučyniu.

• 0
• 0
• 0
• 0
• 0
• 0
• 0
• 0