Z pomnikam paŭstancam 1863 hoda ŭ Vilni ŭźnik niečakany pavarot. Jaho mohuć navat demantavać
Pomnik udzielnikam paŭstańnia 1863-1864 hadoŭ u dvary franciškanskaha klaštara ŭ Vilni pastaŭleny niezakonna, śćviardžaje staršynia Kamisii histaryčnaj pamiaci staličnaj haradskoj rady Kamile Šerajcie-Hahielenie. Pra heta paviedamlaje Delfi.lt.
Čynoŭnica adznačaje, što kamisija, jakuju jana ŭznačalvaje, razhladała hetaje pytańnie letaś, ale nie ŭchvaliła ŭstanoŭku pomnika, pra što inicyjataru prajekta paviedamiła piśmova.
«Kamisija pa histaryčnaj pamiaci razhladała hetaje pytańnie ŭ žniŭni i, jak i naležyć, zdajecca, ciaham 10 pracoŭnych dzion zajaŭniki byli pastaŭlenyja ŭ viadomaść, što Kamisija pa histaryčnaj pamiaci nie dała zhody na ŭstanoŭku pomnika.
Mahu zapeŭnić, što zajaŭniki byli prainfarmavanyja pa paznačanych kantaktach. Nazvanyja kantakty, jakija byli ŭ zajavie, što pastupiła, paćvierdzili fakt atrymańnia našaha nieŭchvaleńnia i prainfarmavali pra heta klaštar», — raskazała Šerajcie-Hahielenie.
Takim čynam, adznačaje staršynia kamisii, možna kanstatavać, što pomnik pastaŭleny niezakonna.
«Jon pavinien byŭ atrymać uchvaleńnie nie tolki z boku municypaliteta, ale i Departamient kulturnaj spadčyny (DKS) pavinien byŭ uchvalić jaho ŭstanoŭku, tamu što heta — terytoryja Staroha horada i hramadskaja prastora», — skazała staršynia Kamisii pa histaryčnaj pamiaci i dadała, što rašeńnie adnosna dalejšych dziejańniaŭ pavinien pryniać DKS.
«Tut jość varyjanty — moža być pryznačany štraf abo dadzieny čas na afarmleńnie ŭsich hetych dazvołaŭ, ci navat demantaž pomnika. Ale tut užo DKS budzie vyrašać, jakim moža być pakarańnie. (…) Pytańnie jašče nie zakrytaje», — skazała čynoŭnica.
U svaju čarhu, pradstaŭniki klaštara śćviardžali, što razmaŭlali i z DKS, i z Kamisijaj pa histaryčnaj pamiaci z nahody ŭstalavańnia pomnika, choć piśmovaj zhody ni ad adnoj ustanovy jany nie atrymali.
Uračystaje adkryćcio pomnika paŭstancam u Vilni prajšło 22 sakavika. Pomnik pastaŭleny ŭ histaryčnym centry, na terytoryi franciškanskaha klaštara, dzie za paŭhoda da pačatku paŭstańnia adbylisia pieršyja relihijna-patryjatyčnyja antyrasijskija manifiestacyi — tamu miesca vybrana zusim nie vypadkova.
Skulpturnaja kampazicyja ciapier staić pierad kaściołam Uniebaŭziaćcia Najśviaciejšaj Dzievy Maryi.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku23
Kamientary