Histaryčny pierałom. Viecier i sonca stali hałoŭnymi krynicami elektraenierhii ŭ Jeŭrasajuzie
Jašče niekalki hadoŭ tamu adnaŭlalnaja enierhietyka razhladałasia jak dadatak da tradycyjnaj, ale ŭ 2025 hodzie jana ŭpieršyniu źmianiła bałans sił. Hety zruch, jaki ekśpierty nazyvajuć pierałomnym momantam, važny nie tolki dla ekałohii, ale i dla nacyjanalnaj biaśpieki ŭsiaho kantynienta.
U 2025 hodzie vietravyja turbiny i soniečnyja paneli zabiaśpiečyli 30% elektraenierhii ŭ ES, tady jak elektrastancyi, što pracujuć na hazie, vuhali i nafcie, dali 29%. Pra heta piša brytanskaje vydańnie The Guardian sa spasyłkaj na novy štohadovy dakład analityčnaha centra Ember. Analityki kažuć pra hłybokuju źmienu struktury jeŭrapiejskaj enierhasistemy.
Bieatrys Piatrovič, viadučaja aŭtarka daśledavańnia, padkreślivaje, što hety zruch maje nie tolki ekałahičnaje, ale i stratehičnaje značeńnie. Va ŭmovach niestabilnaj hieapalityki praźmiernaja zaležnaść ad impartnych enierhanośbitaŭ stanovicca krynicaj niebiaśpieki. Heta asabliva aktualna na fonie napružanaści ŭ adnosinach z ZŠA — asnoŭnym pastaŭščykom zvadkavanaha hazu ŭ Jeŭropu.
Dadatkovym faktaram cisku źjaŭlajecca krytyka z boku amierykanskich čynoŭnikaŭ, jakija papiaredžvajuć Jeŭropu pra ryzyku traplańnia ŭ zaležnaść ad Kitaja praz adsutnaść ułasnaj vytvorčaści akumulataraŭ.
Asnoŭnym ruchavikom pieramien staŭ sapraŭdny bum soniečnaj enierhietyki, jakaja zabiaśpiečyła rekordnyja 13% vypracoŭki ŭ ES. U piaci krainach — uklučajučy Niderłandy, jakija zusim nie słaviacca soniečnym nadvorjem — na dolu soniečnych panelaŭ prypała bolš za 20% usioj elektryčnaści. Vietravyja turbiny vypracavali krychu mienš, čym hodam raniej, ale zastalisia druhoj pa vieličyni krynicaj enierhii, adkaznaj za 17% mahutnaściaŭ Jeŭrasajuza.
Razam z hetym vytvorčaść elektraenierhii z hazu ŭ 2025 hodzie vyrasła na 8%. Pa słovach ekśpiertaŭ, heta adbyłosia pieravažna praź źviazanaje z nadvorjem źnižeńnie vypracoŭki na hidraelektrastancyjach. Adnak hety pakazčyk zastaŭsia značna nižejšym za pikavyja značeńni 2019 hoda. Tym časam vykarystańnie vuhalu ŭpała da novaha histaryčnaha minimumu i skłała mienš za 10% ad usioj elektraenierhii ES, pryčym bolšaja častka hetaj hienieracyi prypała na Hiermaniju i Polšču.
Ekśpierty adznačajuć, što paśla chutkaha rostu vytvorčaści enierhii z adnaŭlalnych krynic pierad Jeŭropaj paŭstaje novy vyklik — adaptacyja infrastruktury. Elektrasietki, jakija doŭhi čas raźvivalisia pad patreby bujnych centralizavanych elektrastancyj, akazalisia nie całkam prystasavanymi da źmiennaj i decentralizavanaj hienieracyi z vietru i sonca.
Asabliva vostra hetaja prablema prajaŭlajecca viečaram: kali popyt na elektraenierhiju rezka raście, a soniečnaja hienieracyja ŭžo padaje, niedachop tradycyjna pakryvaŭsia za košt hazavych elektrastancyj.
Mienavita tut usio bolšuju rolu pačynajuć adyhryvać sistemy zachoŭvańnia enierhii. Akumulatary dazvalajuć nazapašvać liški elektraenierhii ŭ pieryjady nizkaha popytu i vykarystoŭvać ich uviečary, źnižajučy patrebu ŭ darahoj hazavaj hienieracyi.
Pieršyja prykłady takoha padychodu ŭžo jość: u Italii, jakaja vałodaje adnym z najbujniejšych u ES parkaŭ pramysłovych akumulataraŭ, nazapašanaja elektraenierhija ŭsio čaściej zamianiaje haz u viačernija hadziny. Analityki paraŭnoŭvajuć hety praces ź situacyjaj u Kalifornii, dzie akumulatary rehularna pakryvajuć 20% viačernich pikaŭ popytu i vyciaśniajuć haz.
Takija źmieny prymušajuć inviestaraŭ i palitykaŭ pierahladać doŭhaterminovyja płany. Analityki papiaredžvajuć, što dalejšaje budaŭnictva novych hazavych elektrastancyj moža stać ekanamična niemetazhodnym i lehčy ciažaram na plečy padatkapłacielščykaŭ, pakolki tannaja adnaŭlalnaja enierhija i sistemy jaje zachoŭvańnia stanoviacca novaj asnovaj enierhasistemy kantynienta.
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj88
Kamientary