Hałoŭnakamandujučy USU raskazaŭ, dzie rasijanie pasprabujuć prarvać front najbližejšym časam

Paśla taho, jak hałoŭnakamandujučy USU Alaksandr Syrski na praciahu dvuch dzion naviedvaŭ pazicyi na ŭschodzie Ukrainy, jon paviedamiŭ, što «abstanoŭka na Uschodnim froncie ŭ apošnija dni istotna abvastryłasia». Syrski źviazaŭ heta z aktyvizacyjaj nastupu rasijanaŭ paśla praviadzieńnia ŭ Rasii prezidenckich vybaraŭ, piša Bi-bi-si — Ukraina.

U hetych nastupalnych apieracyjach ruskija vykarystoŭvajuć šmat «broni».

«Vorah aktyŭna atakuje našy pazicyi na Limanskim, Bachmuckim napramkach šturmavymi hrupami pry padtrymcy braniatechniki. Na Pakroŭskim kirunku sprabuje prarvać našu abaronu, vykarystoŭvajučy dziasiatki tankaŭ i BMP», — napisaŭ Syrski.

Druhi vielmi prablemny kirunak — rajon na zachad ad Bachmuta, dzie rasijanie zasiarodžvajucca dla praryvu abarony i vychadu da kanała Sievierski Daniec — Danbas, a dalej da Časava Jara i Kramatorska.

Na hetym kirunku, pa słovach Syrskaha, ukrainskija voiny «litaralna ŭhryźlisia ŭ ziamlu, strymlivajučy štodzionnyja ataki voraha».

Z vysnoŭ hałoŭnakamandujučaha za dva dni na froncie — treba naroščvać kolkaść «vysokatechnałahičnych bieśpiłotnych sistem roznaha pryznačeńnia z padrychtavanymi apieratarami», a taksama źviartacca da «asimietryčnych dziejańniaŭ».

Pry hetym Alaksandr Syrski faktyčna paŭtaryŭ tezis svajho papiarednika na pasadzie hałoŭnakamandujučaha, Valeryja Załužnaha pra kluč da pieramohi.

«Znoŭ paŭstała pytańnie dasiahnieńnia techničnaj pieravahi nad praciŭnikam u vysokatechnałahičnych vidach zbroi, — padkreśliŭ Syrski. — Tolki heta daść nam mahčymaść atrymać pieramohu nad vialikim pa kolkaści voraham i stvaryć umovy dla pierachopu stratehičnaj inicyjatyvy».

Jašče adna prablema, na jakuju źviarnuŭ uvahu hałoŭnakamandujučy, heta ŭzrovień padrychtoŭki vojska, asabliva piachoty, jaki treba pavyšać, kab voiny mahli «maksimalna vykarystoŭvać usie mahčymaści bajavoj techniki i zachodniaha ŭzbrajeńnia».

Jašče ŭ kancy 2023 hoda ŭkrainskija bajcy kazali pra «snaradny hoład», kali padraździaleńniam na froncie davodzicca ekanomić i praličvać kožny streł u adkaz na ahniavyja ataki rasiejcaŭ, jakija mohuć nanosić u razy bolš mahutnyja artyleryjskija ŭdary.

Niedachop bojeprypasaŭ stanovicca ŭsio bolš adčuvalny adnačasova z tym, jak usio daŭžej zatrymlivajecca dapamoha Ukrainie ad ZŠA, jakija jašče vosieńniu minułaha hoda zajaŭlali ab novym pakiecie dapamohi na 60 młrd dalaraŭ.

Hety pakiet u lutym 2024 uchvaliŭ amierykanski Sienat. Adnak zaćviardžeńnie ŭ Pałacie pradstaŭnikoŭ Kanhresa kožny raz adkładajecca z-za pazicyi respublikancaŭ, aryjentavanych na Donalda Trampa, byłoha prezidenta ZŠA i mahčymaha pieramožcu nastupnych vybaraŭ.

• 7
• 0
• 0
• 1
• 0
• 3
• 5
• 0