Z pravaabaroncaŭ — u Śviata-Jelisaviecinski manastyr: jak skłaŭsia los eks-palitviaźnia Andreja Bandarenki

Niekali viadomy pravaabaronca i palitviazień, Andrej Bandarenka byŭ źviazany z kiraŭnictvam Śviata-Jelisaviecinskaha manastyra — adyjoznaj ustanovy, viadomaj padtrymkaj režymu Łukašenki i sumnieŭnymi schiemami ŭ pracy i handli.

Pravaabaronca i znajomy Bandarenki Michaił Žamčužny raskazvaje, što Andrej pryjšoŭ u manastyr u druhoj pałovie 2010-ch, paśla druhoha terminu za kratami: «U jaho byli finansavyja prablemy, i jon nie znajšoŭ inšaj pracy, akramia manastyrskaj, tym bolš što jon čałaviek nabožny».

Bandarenka staŭ pracavać u manastyry ŭ adździele prajektaŭ. Ź ciaham času jon uznačaliŭ dabračynny fond «DaPamožam». Zasnavalnikam fonda staŭ Śviata-Jelisaviecinski manastyr, arhanizacyju zarehistravali pa jaho adrasie — Minsk, vulica Vyhockaha, 6. 

Viasnoj 2020-ha ŭ Bandarenki źjaviłasia novaja cikaŭnaść — jon vyrašyŭ stvarać hramadski ruch suprać «ŁHBT-prapahandy». Andrej abvinavaciŭ pradstaŭnikoŭ ŁHBT-supolnaści ŭ tym, što jany dabilisia błakiroŭki jaho paviedamleńniaŭ u fejsbuku, i paabiacaŭ publikavać kantent, jaki paćviardžaje «škodu taho ładu žyćcia, jaki prapahandujuć ŁHBT».

Miarkujučy pa sacsietkach fonda Bandarenki, jon byŭ skancentravany na pracy z manastyrom. Naprykład, fond padtrymlivaŭ pryvatnuju škołu «Ichvis» i patranažnuju słužbu pry manastyry, dapamahaŭ ładzić pravasłaŭny fiestyval «Radaść» pad ehidaj manastyra, źbiraŭ humanitarku dla mužčynskaha padvorku i žanočaha reabilitacyjnaha centra.

Čytajcie taksama: Jak Śviata-Jelisaviecinski žanočy manastyr pieratvaryŭsia ŭ sapraŭdny biznes-chołdynh

Adnak doŭha papracavać sa Śviata-Jelisaviecinskim nie atrymałasia — u 2022 hodzie fond byŭ kančatkova likvidavany.

Dalej, kaža Žamčužny, Bandarenka sprabavaŭ razam ź im dapamahać paciarpiełym ad represij. Ale ŭrešcie byłyja palitviaźni razarvali adnosiny.

Siabry byłoha pravaabaroncy kažuć, što ciapier jon faktyčna zastaŭsia biez pracy.

Bandarenka trapiŭ u aktyvizm jašče ŭ nulavyja — jon, na toj čas pradprymalnik i siabra AHP, udzielničaŭ u parłamienckich vybarach 2008 hoda. U 2010-m Andreja asudzili na 6 hadoŭ źniavoleńnia z kanfiskacyjaj. Adnak Bandarenka zdoleŭ praz sud dakazać svaju nievinavataść i vyjści na svabodu.

Niedzie ŭ tyja časy i ŭźnikła «Płatforma» — arhanizacyja dla abarony pravoŭ viaźniaŭ. U 2012-m «Płatformu» likvidavali, a ŭ 2014-m Bandarenka atrymaŭ novy termin — try hady za «chulihanskija dziejańni, spałučanyja z užyvańniem fizičnaj siły». Pravaabaroncy nie chacieli pryznavać jaho viaźniem sumleńnia ŭ druhi raz, bo abstaviny złačynstva vyhladali bytavymi, a nie palityčnymi.

Čytajcie taksama:

«Čamu vy nie palicie piečy asudžanymi?» Žamčužny raskazaŭ pra prapahandystku Krasoŭskuju, jakaja ŭcierłasia da pravaabaroncaŭ

Seks-orhija zekaŭ, $100 milicyjantu za infarmacyju i 520 sutak u ŠIZA — hutarka z palitviaźniem Michaiłam Žamčužnym paśla vyzvaleńnia

«Dzicia na emocyjach pačało kazać «Ty nas kinuŭ». Palitviazień raskazaŭ, jak vyžyvałasia ŭ navapołackaj kałonii

• 6
• 0
• 9
• 35
• 13
• 21
• 26
• 0