Były palitviazień Źmicier Furmanaŭ adkryvaje ŭ Vilni kramu i tvorčuju prastoru
Hrodziency Źmicier i Volha Furmanavy adkryvajuć u centry Vilni kramu i tvorčuju prastoru Kropka, piša Hrodna.life. Tam buduć pradavać ramiesnyja vyraby i pravodzić majstar-kłasy i vystavy. Na pieršy biznes paru natchniła čakańnie dziciaci.
Źmicier i Volha Furmanavy. Krynica: asabistaja staronka Volhi ŭ Facebook
Krama znachodzicca ŭ starym horadzie pa adrasie vulica Savičiaus, 6. U novaj biełaruskaj kramie ŭ Vilni sužency buduć pradavać vyraby ramieśnikaŭ i tavary ź biełaruskaj i litoŭskaj simvolikaj. U druhim pakoi kramy jany płanujuć rabić majstar-kłasy, vystavy, prezientacyi, prahlady filmaŭ dy inšyja imprezy. Zaraz para kliča majstroŭ i ramieśnikaŭ da supracoŭnictva.
Siarod roznych varyjantaŭ nazvy dla kramy abrali Kropka — bo krama i tvorčaja prastora ŭ adnym miescy musić stać kropkaj zboru roznych ludziej pa roznych intaresach. «Budzie zdorava, kali takija prastory, jakija źbirajuć biełarusaŭ, buduć pa ŭsim śviecie», — kaža Volha Furmanava.
Na pieršy biznes natchniła ciažarnaść
Na stvareńnie kramy Volhu Furmanavu natchniła… ciažarnaść. «Ja pačała zadumvacca, što budzie paśla naradžeńnia dziciaci, jak my budziem dalej žyć, bo nieviadoma, ci buduć niejkija vypłaty pa ciažarnaści. I voś try miesiacy tamu, pračnuŭšysia rankam, skazała mužu, što chaču svaju kramu. Muž mianie padtrymaŭ, i z taho dnia kožny dzień maryła pra heta, zapisvała idei», — raskazała Volha.
Apošnija dziesiać hadoŭ usie jaje pracy byli źviazanyja z prodažam, ale ŭłasny biznes — heta novaje i dla jaje, i dla Źmitra. Jany rychtavalisia: dumali, što patrebna, kab adčynić kramu, zapisalisia na kursy pradprymalnictva, znajšli, jak aformić firmu, arandavali pamiaškańnie, zrabili ramont, a zaraz ustanaŭlivajuć meblu. Adkryćcio płanujecca ŭžo nieŭzabavie.
Chto takija Volha i Źmicier Furmanavy?
Źmicier Furmanaŭ — palitviazień, jakoha asudzili pa «spravie Cichanoŭskaha». Jaho zatrymali ŭ kancy traŭnia 2020 hoda na pikiecie pa zboru podpisaŭ za Śviatłanu Cichanoŭskuju i vynieśli razam z kresłam, na jakim jon siadzieŭ. Furmanava abvinavacili pa č.1 art. 342 KK «Udzieł u hrupavych dziejańniach, jakija hruba parušajuć hramadski paradak». Pavodle prakurora, jon dapamahaŭ šukać Cichanoŭskamu saŭdzielnikaŭ za ŭznaharodu.
Furmanavu prysudzili 2 hady źniavoleńnia i nakiravali ŭ papraŭčuju kałoniju № 3 u haradskim pasiołku Vićba. Amal uvieś čas u kałonii jon pravioŭ u karcary. 21 kastryčnika 2021 jon vyjšaŭ na svabodu z kałonii i ŭ toj ža dzień pakinuŭ Biełaruś. 30 kastryčnika 2021 hoda paśla Kijeva jon pryjechaŭ u Vilniu i sustreŭsia z Volhaj. Uvieś čas źniavoleńnia Volha, na toj čas dziaŭčyna Źmitra, čakała jaho. Jana navat trymała haładoŭku kala SIZA ŭ Minsku na znak pratestu suprać jaho niezakonnaha zatrymańnia i paźniej u Vilni, kali trymaŭ haładoŭku Źmicier. Užo za miažoj para pabrałasia šlubam.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam44
Kamientary