«Na starcie ajcišnik budzie zarablać $300-500 na miesiac». Nakolki składana ŭvajści ŭ IT u 2024 hodzie?
Pa aficyjnych danych, kolkaść rabotnikaŭ IT-haliny ŭ Biełarusi tolki za 2023 hod skaraciłasia na 16%. Paralelna z hetym na hłabalnym uzroŭni rastuć aściarohi nakont taho, što na kolkaść zaniatych u halinie moža mocna paŭpłyvać raźvićcio štučnaha intelektu.
Niama taho, što rańš było
Jašče niekalki hadoŭ tamu internet byŭ poŭny historyj pra lohki ŭvachod u prafiesiju i chutki rost zarobkaŭ. Samu IT-halinu nazyvali drajvieram rostu biełaruskaj ekanomiki. Ale vyhladaje, što lepšyja časy ŭ IT skončylisia. Uvajści ŭ śfieru biez dośviedu pracy ciapier našmat składaniej, čym heta było jašče 3-5 hadoŭ tamu.
HR-śpiecyjalist adnoj ź IT-kampanij kaža, što ŭ apošnija hady znajści pracu džunu značna składaniej, čym hety było da vajny.
Pikavym — i apošnim — hodam, kali ŭ biełaruskim IT naziraŭsia pryrost zaniatych, byŭ 2021 hod. Tady ŭ hetaj śfiery pracavali 108 tysiač śpiecyjalistaŭ. Pa vynikach 2023 hoda takich zastałosia kala 88 tysiač.
Navički prachodziać tolki pad prajekt
«Novych supracoŭnikach u štat pacichu biarom, ale dla hetaha treba, kab kandydat prajšoŭ na kankretny prajekt», — tłumačyć śpiecyjalist.
To-bok džunu, jaki sprabuje ŭładkavacca na pracu, prapanujuć čakać, pakul u kampanii nie źjavicca adpaviedny prajekt. Tolki paśla jaho źjaŭleńnia pryznačajuć sumoŭje z zakazčykam.
Sa startu nie bolš za 300-500 dalaraŭ u miesiac
«Kali kandydat nie prachodzić, to davodzicca čakać dalej. Pry hetym my nikomu nie zabaraniajem paralelna šukać miesca ŭ inšaj kampanii.
Ale časam byvaje, što kandydat sapraŭdy tałkovy, maje mocnuju tearetyčnuju bazu i matyvacyju. Tady možam uziać u štat. Takich ludziej kala miesiaca padciahvajem, vučym, jak prachodzić sumoŭi, paśla čaho prapanujem sumoŭi z zamoŭcami», — tłumačyć śpiecyjalist.
Atrymlivajecca, što, kab adrazu patrapić u štat, džunu śpiarša treba paśpiachova prajści sumoŭje z techničnymi śpiecyjalistami kampanii. Dla hetaha jon musić vydatna vałodać teoryjaj, rabić vučebnyja prajekty, pakazać svoj kod.
Pry hetym, pa słovach surazmoŭcy, taki čałaviek musić być hatovy da taho, što na starcie jon budzie zarablać 300-500 dalaraŭ na miesiac. Paśla, kali ŭžo trapić na prajekt, to da hetaha akładu dadaducca prajektnyja bonusy.
Što tyčycca ŭžo śpiecyjalistaŭ z dośviedam pracy, to im pa słovach HR-mieniedžara, znajści pracu praściej, čym pačatkoŭcam, bo lahčej patrapić na prajekt.
Ale, jak i ŭ vypadku z džunami, na pracu ŭ štat za vyklučeńniem redkich vypadkaŭ biaruć tolki kali znachodzicca miesca na prajekcie. Pracaŭładkavacca ŭ štat navat midłam ciapier składaniej, čym heta było niekalki hadoŭ tamu.
Što pa vakansijach?
Na papularnym sajcie pa pošuku pracy rabota.by dla prahramistaŭ-pačatkoŭcaŭ kala 50 vakansij, na jakija hatovyja pracaŭładkavać śpiecyjalista biez dośviedu pracy.
Takim abiacajuć zarpłatu ad 200-300 da 400-800 dalaraŭ na ruki.
Dla paraŭnańnia, dla ajcišnikaŭ z dośviedam pracy ad 1 da 3 hadoŭ raźmieščana kala 300 vakansij. Anałahičnaja kolkaść prapanoŭ i dla śpiecyjalistaŭ z dośviedam pracy ad 3 da 6 hadoŭ.
Asobna ŭ IT-industryi možna vyłučyć adukacyjnyja kursy, jakich pa-raniejšamu šmat, bo heta asobny vid biznesu, pieršasnaja zadača jakoha — dać čałavieku viedy, a nie zabiaśpiečyć jaho pracaj.
Pry hetym naš surazmoŭca papiaredžvaje, što ludziam, jakija chočuć uvajści ŭ IT z nula, varta zabycca na historyi 3-5 hadovaj daŭniny, kali pa zaviaršeńni kursaŭ možna było adnosna lohka znajści sabie pracu.
«Biełaruski IT-siektar zvužajecca, a razam ź im i kolkaść pracoŭnych miescaŭ, tamu džunam ciapier asabliva składana. Pracaŭładkoŭvać čałaviek biez dośviedu pracy aznačaje, što pracadaŭcu treba inviestavać u jaho navučańnie, čakać, pakul jon padraście. U situacyi, kali na rynku chapaje śpiecyjalistaŭ z dośviedam, vazicca z džunami asablivaj patreby ŭ kampanij niama.
Tamu midły i sieńjory biez pracy nie zastanucca, choć byvaje, što pa zarobku jany mohuć apuścicca na ŭzrovień nižej», — dadaje surazmoŭca.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary