«Biełavija» sprabavała zakupić novyja samaloty, ale kitajskija darahija, a rasijskija nieprydatnyja dla dalokich palotaŭ
Zakupić zachodnija, navat patrymanyja, samaloty pakul nie atrymlivajecca praz sankcyi. Pra heta piša «Biełpoł» sa spasyłkaj na aficyjnyja dakumienty.
Dniami hiendyrektar avijakampanija «Biełavija» Ihar Čarhiniec zajaviŭ, što, niahledziačy na sankcyi, kampanija nie maje prablem z zapasnymi častkami i harantuje biaśpieku palotaŭ.
Razam z tym, zhodna z dakumientami, jakija dastaŭ «Biełpoł», sankcyi značna ŭskładnili pracu «Biełavija».
Apošnija samaloty byli zakupleny ŭ 2020 hodzie ŭ lizinh. Ciapier zapyty na zakupku marak Boeing, Airbus i Embraer ci ihnarujucca, ci za ich patrabujuć 100% pieradapłatu, što pahražaje zamarožvańniem srodkaŭ. Jak vynikaje z dakumientaŭ, u avijakampanii takich srodkaŭ niama.
«Biełavija» nakiravała zvyš 70 zapytaŭ lizinhavym kampanijam, ale jany admovilisia ad supracoŭnictva. Byli zvaroty da ŭładalnikaŭ patrymanych samalotaŭ u Tadžykistanie, Kyrhyzstanie, Kitai, AAE, Turcyi, Sinhapury, Uźbiekistanie i Manholii. Ale i jany admovilisia.
Adzinaj krainaj, jakaja prapanavała supracoŭnictva, byŭ Kitaj. Ale ŭ hetym vypadku sama «Biełavija» admoviłasia. Pryčynaj staŭ vysoki košt i najaŭnaść u samalotach zachodnich kamplektujučych, što stvaryła b prablemy z techničnym absłuhoŭvańniem.
Sproby nabyć samaloty rasijskaj vytvorčaści pakul znachodziacca na stadyi abmierkavańnia, bo sami avijałajniery tolki płanujucca da sieryjnaj vytvorčaści. U lepšym vypadku ich pastaŭki mohuć adbycca ŭ 2027 hodzie. I heta pry ŭmovie padpisańnia kantraktu ŭžo ciapier.
Biełaruski bok nie idzie na padpisańnie, bo ličyć ceny zavyšanymi. Kali b nie sankcyi, to zachodnija anałahi rasijskich MS-21-310 karparacyi «Jakaŭleŭ» ci Sukhoi Superjet 100 abyšlisia b bolš čym u dva razy tańniej.
Jašče adnoj pieraškodaj u nabyćci źjaŭlajecca niežadańnie rasijskich lizinhavych kampanij pracavać z «Biełavija». Da hetaha treba dadać nieadpaviednaść rasijskich samalotaŭ zajaŭlenym lotna-techničnym charaktarystykam.
Zamiena impartnych ruchavikoŭ rasijskimi anałahami zrabiła hetyja mašyny ciažejšymi i adnačasova źniziła faktyčnuju dalnaść i vyšyniu palotu. Tamu jany niepryhodnyja dla palotaŭ u Indyju, Kitaj, AAE i Jehipiet.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary