Jahoraŭ patłumačyŭ, jak jon ujaŭlaje viartańnie pasłoŭ u Biełaruś u abmien na palitviaźniaŭ

Na dumku Jahorava, ciapier biełaruski ŭrad šukaje mahčymaści dla padvyšeńnia svajoj subjektnaści, jakaja znachodzicca ŭ asłablenym stanie. Z adnaho boku, aficyjny Minsk «znachodzicca ŭ mižnarodnaj izalacyi», ź inšaha, heta «faktyčna satelit Rasii», kaža eks-śpikier KR. 

U doŭhaterminovaj pierśpiektyvie vyžyvalnaść režymu zaležyć nie tolki ad Rasii, ale i ad bolš šyrokich kantaktaŭ na mižnarodnym uzroŭni, upeŭnieny Jahoraŭ:

«Režym robić kroki dla padvyšeńnia svajoj subjektnaści — sumiesnyja vučeńni z Kitajem, sproby ŭskočyć u abmieny z zatrymanymi palitźniavolenymi. U hetym ja baču pošuk sposabaŭ padvyšeńnia svajoj subjektnaści, novych suviaziaŭ i harantyj, jakija byli b niezaležnyja ad Rasii. Tut dypłamatyčny resurs demakratyčnych sił moža być skarystany dla taho, kab abmianiać hetyja žadańni na vyzvaleńnie palityčnych viaźniaŭ.

Dumaju, u hetym płanie najbolš prosty krok — abumoŭlenaje viartańnie [jeŭrapiejskich] ambasadaraŭ u Biełaruś. Režym i tak častkova maje mižnarodnuju pravasubjektnaść — biełaruskija čynoŭniki jeździać na roznyja kanfierencyi, u AAN. Šviejcarski pasoł prysutničaje ŭ Biełarusi, japonski pasoł vydaje davierčyja listy Łukašenku. Čamu b nie pasprabavać vykarystać taki krok?»

Jahoraŭ miarkuje, što apošnija kroki biełaruskaha ŭrada śviedčać: vychad palitźniavolenych moža być mahčymy. Jon zhadvaje pamiłavańnie 18 palitviaźniaŭ u pačatku lipienia, a taksama dva abmieny, u jakich ź biełaruskich turmaŭ vyjšli viaźni — abmien z udziełam ukrainskich hramadzian i vyzvaleńnie Ryka Kryhiera. Na dumku Jahorava, heta sihnały, jakija pakazvajuć: skłałasia situacyja, jakoj treba chacia b pasprabavać skarystacca dla vyzvaleńnia ludziej.

«Možna tearetyčna padbirać arhumienty za i suprać, ale pakul vy padbirajecie arhumienty, ludzi praciahvajuć siadzieć u turmach. U hetaj situacyi čamu b nie pasprabavać zrabić praktyčnyja kroki? Tady b možna było zrazumieć, nakolki toj bok hatovy vyzvalać ludziej, kolki ludziej jany hatovyja vyzvalić — niekalki dziasiatkaŭ, socień. Urešcie, kolkaść pasłoŭ składaje niekalki dziasiatkaŭ».

Jahoraŭ kaža pra nieabchodnaść adšturchoŭvacca ad ciapierašniaha stanovišča:

«Režym kantraluje krainu, mižnarodnyja kantakty ŭ jaho jość, praktyčnyja pytańni vyrašajucca z udziełam pradstaŭnikoŭ režymu, a nie demakratyčnych sił. Možna, kaniešnie, hanarliva nasić značok, što ty lehitymny, ale pry hetym być vyklučanym, naprykład, z pracesaŭ abmienu palitviaźniami. Moža, varta nie tak abaraniać hetuju śviaščennuju lehitymnaść, a pasprabavać usio ž taki paŭdzielničać u realnaj palitycy. 

Miarkuju, što vyzvaleńnie ludziej paspryjaje źmiakčeńniu represij. Znoŭ-taki, pra heta ŭsio možna vieści pieramovy, i pakul ich nie pačnieš, nieviadoma, što z hetaha vyjdzie.

Kali źjaviacca novyja vajennapałonnyja, heta ž nie značyć, što my nie musim vyzvalać tych, chto ciapier u pałonie».

Apytanka

• 3
• 13
• 2
• 0
• 1
• 0
• 3
• 1