Rasijskaja «Sota» znoŭ «vykryła» Cichanoŭskuju i Łatušku. I znoŭ sieła ŭ łužynu

SotaProject pryčapiłasia da dopisu ŭ telehram-kanale Abjadnanaha pierachodnaha kabinieta (APK).

9 žniŭnia, u hadavinu vybaraŭ-2020, u 11:45 u im źjaviŭsia tekstavy zvarot Paŭła Łatuški: «Ja budu zmahacca za vyzvaleńnie palityčnych źniavolenych z turmaŭ Łukašenki, nie spyniu baraćbu za vyzvaleńnie Biełarusi ad jahonaj dyktatury. Žyvie naša mara, žyvie naša meta i sprava! Žyvie Biełaruś!»

Da zvarotu było prymacavana videa pramovy Paŭła Łatuški, zroblenaj 14 žniŭnia 2020 hoda kala Kupałaŭskaha teatra, Ludzi za jaho śpinaj trymajuć płakaty «Kupałaŭcy suprać hvałtu», «Sychodź». Videa zroblenaje karespandentam Tut.by.

Ale Sota pryjšła da paradaksalnych vysnovaŭ: spasyłajučysia na błohiera-kanśpirołaha Vitala «Virusa» Kandracienku, zapeŭniła čytačoŭ, što apublikavanyja kadry z vystupam Łatuški adnosiacca da 2021 hoda i patłumačyła: «Pryčynaj padmieny stała toje, što novy mitynh u Varšavie, pierad pałacam Stašyca, dzie vystupaŭ Łatuška, supravadžaŭsia płakatami suprać abviaščeńnia Cichanoŭskaj siabie niaźmiennaj «nacyjanalnaj lidarkaj».

Niaŭžo sapraŭdy tak? Davajcie raźbiaremsia.

Uviečary 9 žniŭnia 2024 hoda ŭ Varšavie sapraŭdy adbyłasia akcyja salidarnaści, na jakoj vystupaŭ Łatuška. Ale łohika padkazvaje, što telehram-kanał APK nijak nie moh apublikavać ranicaj taho dnia videa ź mierapryjemstva, jakoje jašče nie adbyłosia.

Što ž adbyvałasia na akcyi ŭ Varšavie? Tam prysutničali niekalki sotniaŭ čałaviek. Niekalki čałaviek trymali płakaty «Cichanoŭskaja i Łukašenka, sychodźcie», «Što zrabiła za 4 hady?», «Sama syjdzieš?».

Pavialičyć

Pavialičyć

Z trecim płakatam adbyłasia śmiešnaja situacyja: žurnalisty sajta Reform apisali, jak žančynie z płakatam «Sama syjdzieš?» padkazali, što ŭ jaje nadpisie jość pamyłka. Pa-biełarusku dziejasłovy pišucca bieź miakkaha znaka na kancy. Jana zakreśliła «», ale ŭsio adno pakinuła lišniaje «j» u słovie. Pravilna pisać — «sydzieš».

Pavialičyć

Što za žančyny heta byli, nieviadoma. Biełaruskija ŚMI, dbajučy pra biaśpieku ŭdzielnikaŭ akcyi, nie pakazvajuć tvary ludziej. Tym nie mienš, svabodu vykazvańnia nichto nie admianiaŭ, tamu ich płakaty trapili ŭ fotarepartažy.

Videa z vystupu Łatuški ŭ centry Varšavy taksama jość u svabodnym dostupie. Jano źniataje zblizku, tamu płakataŭ nie vidać — ni suprać Cichanoŭskaj, ni suprać astatnich. 

SotaProject praciahvaje svajo asensavanaje zmahańnie sa Śviatłanaj Cichanoŭskaj užo niekalki miesiacaŭ. Haračaja stadyja pačałasia paśla taho, jak śpiecyjalnym karespandentam vydańnia stała błohierka Beła Foks, zaciaty krytyk Cichanoŭskaj. Vydańnie salidaryzavałasia z pazicyjaj svajoj aŭtarki.

• 3
• 4
• 35
• 24
• 0
• 0
• 7
• 0