Były palitviazień pra Čudziancova: Viedaju ludziej, jakija ad jaho paciarpieli za kratami
Palitviazień Viktar Pancialejeŭ adbyvaŭ pakarańnie ŭ kałonii №15. Tam ža siadzieŭ i Uładzimir Čudziancoŭ. U intervju Viktar padzialiŭsia tym, što pabačyŭ i pačuŭ pra jaho dziejańni za kratami.
Čytajcie: «Kali trapiŭ za kraty, siabry prosta źnikli». Spoviedź bieraściejca, jaki zastupiŭsia za dziaŭčynu pierad siłavikami i atrymaŭ 4 hady
«Jon pracavaŭ suprać svaich i čužych. Ja staraŭsia trymać jaho na adlehłaści ad siabie i nie hutaryć ź im, chacia našy nary i byli susiednija.
Kali jamu niešta nie padabajecca, akno adčynienaje ci ŭ prachodzie miž nar niechta źbirajecca, jon dva razy niešta kaža, a na treci raz idzie skardzicca. Administracyja jaho lubiła, heta pieršy čałaviek z ekstremisckim prafulikam, jaki źniaŭ status złosnaha parušalnika, usio ŭ jaho tam fajna.
Chvaliŭsia, što jon biznesmien, zrabiŭ Nexta, padciahnuŭ tudy Pratasieviča.
Adzin moj znajomy, kali šyŭ sabie palčatku, zrabiŭ jaje ŭ BČB-kolerach, dyk jaho adpravili ŭ ŠIZA i pieraviali ŭ horšy atrad. A kali Čudziancoŭ rabiŭ tarty z BČB-ściaham, jamu za heta ničoha nie było, i ŭsie heta bačyli. Viedaju ludziej, jakija praź jaho paciarpieli: kali jon prynosiŭ pra kahości infarmacyju, čałaviek minimum na piać sutak adpraŭlaŭsia ŭ ŠIZA».
Raniej niekalki palitviaźniaŭ užo raskazvali, što Uładzimir Čudziancoŭ supracoŭničaje z administracyjaj.
***
Uładzimir Čudziancoŭ byŭ zatrymany ŭ listapadzie 2019 hoda ŭ ciahniku padčas pajezdki ŭ Polšču. U jaho nibyta znajšli narkotyki. Kančatkovaje abvinavačańnie było nastupnym:
- č. 2 artykuła 343 (raspaŭsiud porna zaviedama niepaŭnaletniamu) — 2 hady;
- č. 1 artykuła 328 — zachoŭvańnie narkotykaŭ;
- č. 1 artykuła 14, č. 1 artykuła 328 (zamach na niezakonny pieravoz narkotykaŭ praz hranicu) — 4 hady i štraf 27 tysiač rubloŭ.
U 1990-ja Čudziancoŭ (tady pad proźviščam Zujeŭ) byŭ aŭtaram prapahandysckich artykułaŭ pra apazicyjanieraŭ. Paśla Kryma-2014 rezka źmianiŭ pazicyju, zajmieŭ antypucinskija i antyłukašenkaŭskija pohlady. Ličyŭsia adnym z aŭtaraŭ telehram-kanała «Niechta».
Termin Čudziancova skančajecca praź niekalki miesiacaŭ.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro2
Kamientary