Ukrainu šturchajuć da płana B — The Wall Street Journal

Siońnia ŭ Kijevie adkryvajecca čarhovaja kanfierencyja «Krymskaja płatforma» z udziełam najvyšejšych asob krain Zachadu, siarod jakich dziaržsakratar ZŠA Entani Blinkien i ministr zamiežnych spraŭ Vialikabrytani Devid Łemi. Napiaredadni hetaj padziei The Wall Street Journal apublikavała artykuł z analizam situacyi. Znajomim z asnoŭnymi pałažeńniami.

Aŭtary artykuła adznačajuć, što za apošnija dva tydni ŭ Kijevie znachodzilisia vysokapastaŭlenyja amierykanskija i jeŭrapiejskija čynoŭniki.

Sustrečy pakazali, što ZŠA i jeŭrapiejskija sajuźniki pa-raniejšamu padtrymlivajuć zajaŭlenuju prezidentam Ukrainy Uładzimiram Zialenskim doŭhaterminovuju metu vycieśnić Rasiju z usioj terytoryi Ukrainy, ale niekatoryja jeŭrapiejskija dypłamaty kažuć, što krainie treba być bolš realistyčnaj u vyznačeńni svaich vajennych met i stratehii.

Heta moža dapamahčy zachodnim čynoŭnikam upeŭnić svaich vybarščykaŭ u nieabchodnaści pastavak zbroi i dapamohi Ukrainie.

Pa słovach vysokapastaŭlenych jeŭrapiejskich čynoŭnikaŭ, Kijevu było skazana, što dla poŭnaj pieramohi Ukrainie patrebnaja padtrymka na sotni miljardaŭ dołaraŭ, čaho ni Vašynhton, ni Jeŭropa realna paciahnuć nie mohuć.

U aŭtorak Blinkien zajaviŭ, što jahonaja pajezdka siarod inšaha nakiravanaja na toje, kab zrazumieć, «jak mienavita ŭkraincy bačać svaje patreby ŭ hety momant, da jakich met jany imknucca i što my možam zrabić dla taho, kab padtrymać ich u dasiahnieńni hetych met».

Pavialičyć

Dziaržsakratar ZŠA skazaŭ, što jon i ministr zamiežnych spraŭ Vialikabrytanii paviedamiać pra vyniki pajezdki prezidentu Bajdenu i premjer-ministru Vialikabrytanii Kiru Starmieru, jakija potym abmiarkujuć hetaje pytańnie na sustrečy, što adbudziecca ŭ piatnicu.

Heta moža stać preludyjaj da padpisańnia ZŠA i Vialikabrytanijaj pahadnieńnia ab vykarystańni Ukrainaj rakiet dalokaha radyusu dziejańnia dla paražeńnia celaŭ na terytoryi Rasii. Ale aficyjnyja asoby papiaredžvajuć, što kančatkovaje rašeńnie jašče nie pryniataje.

Pradstaŭnik Rady nacyjanalnaj biaśpieki Biełaha doma Džon Kirbi zajaviŭ, što pajezdka ŭ Kijeŭ nie źviazanaja z prymusam Ukrainy da pieramoŭ: «Zrazumieła, najbolš imaviernym vynikam biahučaj situacyi źjaŭlajecca dasiahnieńnie damoŭlenaści praź pieramovy. Adnak kali mienavita heta adbudziecca i pry jakich umovach, budzie zaležać ad rašeńniaŭ prezidenta Zialenskaha».

Vydańnie zaŭvažaje, što niahledziačy na toje, što i Rasija i Kijeŭ zajavili, što adkrytyja dla spynieńnia ahniu ci mirnych pieramoŭ, nasamreč abodva baki dalokija ad taho, kab heta zrabić.

«Krymskaja płatforma» papiaredničaje pajezdcy Zialenskaha ŭ ZŠA dla ŭdziełu ŭ Hienieralnaj Asamblei AAN. Prezident Ukrainy paabiacaŭ, što padčas vizitu paznajomić sa svaim płanam pieramohi. Jon zajaviŭ, što choča sustrecca z prezidentam Džo Bajdenam i kandydatami ŭ prezidenty Donaldam Trampam i Kamałaj Charys, kab zaručycca ich padtrymkaj. Ale pakul nieviadoma, ci adbuducca hetyja sustrečy.

Zachodnija dypłamaty praciahvajuć śćviardžać, što prezidenckija vybary ŭ ZŠA zastajucca krytyčna važnymi z punktu hledžańnia taho, na jakuju dapamohu amierykancaŭ Ukraina moža raźličvać u karotkaterminovaj pierśpiektyvie. Tym nie mienš mała chto vieryć, što zachodniaja padtrymka na sioletnim uzroŭni moža zastavacca na praciahu mnohich hadoŭ.

Novy mirny płan Zialenskaha, piša WSJ, śviedčyć pra toje, što jon mianiaje svaju publičnuju pazicyju. Raniej prezident Ukrainy nastojvaŭ na viartańni ŭsich terytoryj Ukrainy da pačatku lubych mirnych pieramoŭ. Adnak letam Ukraina razhladała mahčymaść pieramoŭ z Rasijaj ab skaračeńni atak na enierhietyčnuju infrastrukturu adna adnoj. Pra heta paviedamlali jak ukrainskija, tak i rasijskija dy zachodnija aficyjnyja asoby.

Adnak spynieńnie bajavych dziejańniaŭ va ŭmovach akupacyi Rasijaj ukrainskaj terytoryi moža stać dla Zialenskaha palityčnym samazabojstvam. Niahledziačy na toje, što apošnija apytańni pakazali pastupovy rost kolkaści ŭkraincaŭ, hatovych da pieramoŭ, bolš za pałovu nasielnictva vykazvajecca za praciah bajavych dziejańniaŭ da toj pary, pakul Ukraina nie viernie svaich ziemlaŭ.

Vydańnie cytuje vice-prezidenta pa daśledavańniach Fondu Karniehi Endru Vajsa (Andrew Weiss), jaki zajaviŭ, što «partniory Kijeva, napeŭna, zaniepakojenyja zdolnaściu Ukrainy supraćstajać poŭnamaštabnamu rasijskamu nastupu», adnak zdolnaść zachodnich dziaržaŭ padšturchnuć Ukrainu da sastupak, suprać jakich jana vystupaje, abmiežavanaja.

«Kurskaja apieracyja — heta jašče adzin napamin pra toje, što ŭkraincy zachoŭvajuć vialikuju dziorzkaść i žadańnie ździvić navat svaich zachodnich partnioraŭ», — skazaŭ jon.

• 4
• 2
• 3
• 5
• 5
• 2
• 7
• 0