Biełarusy adkryli ŭ Buenas-Ajresie kafe, dzie ceły dzień padajuć draniki
«Arhiencincy abažajuć bulbu, i ŭ dranikaŭ jość usio, kab im spadabacca».
Biełarusy adkryli ŭ Buenas-Ajresie kafe z dranikami La Papa. Adna sa stvaralnic, Julija Łakatkova, da pierajezdu ź Minska pracavała ŭ markietynhu. Kafe jana adkryła razam z mužam i ich svajakom-povaram, piša arhiencinskaje vydańnie Clarin.
Julija pabačyła ŭ dranikach patencyjał: ich univiersalnaść i rost intaresu žycharoŭ Buenas-Ajresa da bolš zdarovych straŭ dapamahli joj vyznačyć kancepcyju.
U La Papa draniki padajuć u luby čas: na śniadanak — z avakada, jajkam abo łasosiem hraŭłaks (syrym łasosiem, zamarynavanym u soli, cukry i kropie), na abied — porcyjami pa piać štuk z łasosiem i śmietankovym syram. Taksama možna vybrać adzin ź piaci chatnich sousaŭ — piercavy, śmiatanny, śmietankova-syrny, ajoli abo barbiekiu — i dadać da dranikaŭ smažanaje miasa, hryby, łasoś, jaječniu abo avakada.
Jość i vafli z taho ž bulbianoha ciesta — z avakada i jaječniaj. Jašče adzin varyjant — «biełaruskaja tastada»: dva bulbianyja tosty z huakamole i łasosiem. Siamja taksama ekśpierymientuje z novaj stravaj — empanadaj z bulbianoha ciesta zamiest tradycyjnaha.
Hałoŭny pryncyp kafe — poŭnaja adsutnaść hlutenu. «Paśla adkryćcia my zrazumieli, nakolki važna dla Arhienciny znajści smačnuju i nadziejnuju ježu biez hlutenu. Tamu ŭ našu ŭstanovu nie zachodzić ničoha, što ŭtrymlivaje hluten», — raspaviadaje Julija.
Pavodle jaje słoŭ, bolšaść pytańniaŭ, jakija joj dasyłajuć u Instagram, tyčacca mienavita hetaha.
«Naša mara — kab adnojčy draniki stali takimi ž viadomymi i papularnymi, jak sušy abo korn-dohi. A čamu b i nie? Arhiencincy abažajuć bulbu, i ŭ dranikaŭ jość usio, kab im spadabacca. Jany hatujucca pry vas, atrymlivajucca załacistymi i chrumstkimi zvonku, dalikatnymi ŭnutry, i ich možna spałučać z roznymi sousami i dabaŭkami», — upeŭnienaja Julija.
Kamientary
* - Ja lublu dranik ź jajkam i cybulaj