Źjaviłasia videa z rasstrełam rasijanami 16 ukrainskich vajennapałonnych
1 kastryčnika ŭ telehram-kanałach źjaviłasia infarmacyja pra vierahodny rasstreł pradstaŭnikami Uzbrojenych sił Rasii 16 ukrainskich vajskoŭcaŭ. Heta adbyłosia, jak śćviardžajecca, u rajonie siołaŭ Mikałajeŭka i Suchi Jar Pakroŭskaha rajona na Danieččynie. Hienieralnaja prakuratura Ukrainy ŭ suviazi z hetym pačała rasśledavańnie.
Na apublikavanym videa zafiksavana, jak pad kantrolem rasijskich vajskoŭcaŭ ukraincy, uziatyja ŭ pałon, vyjšli ź lesapasadki. Paśla taho, jak jany vystrailisia ŭ šerah, rasijanie adkryli pa ich ahoń na paražeńnie. Paranienych, jakija padavali prykmiety žyćcia, dabili aŭtamatnymi čerhami.
«Heta samy masavy viadomy vypadak rasstrełu ŭkrainskich vajskoŭcaŭ na linii frontu. I heta jašče adno śviedčańnie taho, što zabojstvy i katavańni pałonnych — nie vypadkovaść, a metanakiravanaja palityka rasijskaha vajskovaha i palityčnaha kiraŭnictva», — zajaviŭ hienieralny prakuror Ukrainy Andrej Kościn.
Takija dziejańni, pavodle ŭkrainskaj Hienprakuratury, źjaŭlajucca cyničnym i hrubym parušeńniem Ženieŭskich kanviencyj i kvalifikujucca jak ciažkoje mižnarodnaje złačynstva.
Ciapier pravodziacca mierapryjemstvy pa praviercy apublikavanaha materyjału.
Heta nie pieršy padobny vypadak. Tak, 6 vieraśnia telekanał CNN apublikavaŭ videa, na jakim, jak śćviardžajecca, źniatyja kadry zabojstva rasijskimi vajskoŭcami ŭkrainskich sałdat, jakija zdajucca ŭ pałon. Videa było źniata z dapamohaj bieśpiłotnikaŭ. Vajskovaja raźviedka Ukrainy pieradała CNN samo videa i aŭdyjorasšyfroŭku zahadu zabić sałdat.
AAN: Rasijskija vajskoŭcy zabili ŭzimku minimum 32 ukrainskich vajennapałonnych
U rasstrele pałonnych ukrainskich bajcoŭ na Zaparožžy padazrajuć pskoŭskich desantnikaŭ
Va Ukrainie rasśledujuć zabojstva rasiejcami biazzbrojnych bajcoŭ USU, što zdavalisia ŭ pałon
«Pakul araby režuć hałovy jaŭrejam, dobryja ruskija staviacca da chachłoŭ zanadta humanna». Novy naratyŭ prapahandy
Ciapier čytajuć
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać15
Kamientary