Biełaruska matematyčna dakazała, što kuplać bulbu bolš vyhadna, čym vyroščvać. U kamientarach haračyja sprečki
Kryścina vielmi mocna nie chacieła ŭ čarhovy raz jechać kapać bulbu ŭ viosku da baćkoŭ muža, a hałasłoŭnyja zapeŭnivańni ŭ duchu «vyhadniej kupić na rynku» nie dapamahali. Pryjšłosia źviarnucca da skrupuloznaj matematyki. Dziaŭčyna ŭziałasia za padliki, zaklučyŭšy zakład na 100 rubloŭ sa śviakruchaj.
Dakładnymi raźlikami biełaruska padzialiłasia ŭ tyktoku, zaŭvažyŭ Onliner.
Voś što i na jakija sumy treba dla pasadki pola na 13 sotak:
- hnoj za 70 rubloŭ, jaki pryjazdžaje rastreści muž Kryściny, marnujučy na paliva 46,8 rubla;
- uzvorvańnie pola traktaram pa taryfie 4 rubli za sotku, heta značyć usiaho vychodzić 52 rubli;
- narezka radoŭ — 50 rubloŭ;
- sama pasadka 13 miaškoŭ bulby sažałkaj abychodzicca ŭ tyja ž 52 rubli (rascenki jak u traktara). Sadžać pryjazdžajuć Kryścina z mužam (plus 46,8 rubla za bienzin) i brat muža, u jakoha vydatki na paliva bolš (vychodzić 78 rubloŭ);
- letam treba trojčy abhaniać bulbu, adzin raz pratručvać travu i dva-try razy trucić žukoŭ. Abhonka — 3 rubli za sotku (dla hetaha nieabchodny pryjezd muža). Razam: 117 rubloŭ. Vydatki na chimiju ad parazitaŭ — 20 rubloŭ, i znoŭ ža siudy ŭklučajem bienzin dla aŭto;
- kapać bulbu pryjazdžajuć dźvie siamji (124,8 rubla — ahulnyja vydatki na paliva). Razahnać kapałkaj pole — 52 rubli.
Padbiŭšy ŭsie vydatki, Kryścina vyvieła sumu ŭ 808,2 rubli.
Što atrymlivaje siamja za hety košt? 45 miaškoŭ bulby, ź ich prydatnaj da ŭžyvańnia ŭ ježu nabiarecca tolki 22 miaški: zanadta drobnaja pojdzie na korm kuram, siaredniaja — na nasieńnie. Kryścinie ž z mužam dastaniecca tolki 7 miaškoŭ.
Dziaŭčyna viedaje, dzie šukać adbornuju bulbu hatunku «Skarb» pa 1 rublu za kiłahram, dy i ŭ vioscy susiedzi addaduć kolki zaŭhodna pa takim ža košcie.
Vychodzić na 808 rubloŭ možna, adpaviedna, kupić 808 kiło kłubniaŭ — u miaškach atrymlivajecca 23 štuki pa 35 kiłahram. Heta značyć na ceły adzin miašok bolš, čym udałosia vyraścić svaimi namahańniami, ale pa tym ža košcie.
U kamientarach čakana sčapilisia dźvie krajnaści.
Pałova karystalnikaŭ Kryścinu padtrymała, maŭlaŭ, narešcie chtości ŭziaŭ i zmoh dakazać baćkam, što bulbačka ź lecišča nie biaspłatnaja.
Niekatoryja dziaŭčaty prapanavali dadać u zatraty navat adnaŭleńnie sapsavanaha na aharodzie manikiuru.
Druhaja častka apieluje da viekavych tradycyj, čystaha pavietra i taho, što čas, praviedzieny z rodnymi za karysnaj spravaj, potym ni za jakija rubli nie kupiš.
Zrazumieła, znajšlisia i dzirki ŭ padlikach, i vypady pra nizkuju ŭradžajnaść pola ŭ śviakruchi Kryściny («z 13 sotak pavinna atrymacca minimum 100 miaškoŭ»).
A «ekanamisty» panura zajavili, što kali ŭsie pabiahuć kuplać bulbu, to košt na jaje ŭźlacić da niabiosaŭ.
Kamientary
Pusť tohda posčitajet skolko jedy jeŝie oni tam sjeli i skolko vodki śviekr s mužiem vypili