U sierbskim horadzie na vakzale abrynuŭsia bietonny kazyrok i nakryŭ dziasiatki ludziej
8 čałaviek zahinuli i nie mienš za 30 atrymali ranieńni z-za abvalvańnia bietonnaha kazyrka na budynku vakzała ŭ horadzie Novi-Sad u Sierbii, piša «Radyjo Svaboda».
Ratavalniki raźbirajuć zavał, jaki ŭtvaryŭsia paśla padzieńnia — pad im jašče mohuć być ludzi. Ministr unutranych spraŭ Sierbii zajaviŭ, što vyratavalnaja apieracyja była «nadzvyčaj składanaj» i što jana praciahniecca jašče jak minimum niekalki hadzin. Pad zavałami mohuć znachodzicca jašče dva čałavieki
Adpraŭleńnie ciahnikoŭ z vakzała prypyniena.
Premjer-ministr Sierbii Miłaš Vučyč zajaviŭ, što heta «adzin z samych ciažkich dzion u paślavajennaj historyi Novi-Sadu». Jon paabiacaŭ, što pryčyny abrynańnia buduć rasśledavanyja, a vinavatyja paniasuć pakarańnie. Hienieralnaja prakuratura Sierbii pačała rasśledavańnie.
Čyhunačny vakzał u Novi-Sadzie — bujnym horadzie za 70 kiłamietrach ad Białhrada, stalicy aŭtanomnaha rehijona Vajavodzina, — byŭ pabudavany ŭ 1964 hodzie. Niadaŭna jon prajšoŭ kapitalny ramont i byŭ znoŭku adkryty ŭ lipieni hetaha hoda.
Va ŭpraŭleńni infrastruktury sierbskich čyhunak udakładnili, što bietonny navies, jaki abrynuŭsia, nie byŭ pradmietam rekanstrukcyi, ramont tyčyŭsia dachu i fasada pad i nad naviesam.
Kamientary