Rezidenty PVT pieraličyli hrošy na vybarčuju kampaniju Łukašenki
U Parku vysokich technałohij praviali pikiet pa zbory podpisaŭ za Łukašenku. Ale hetym sprava nie abmiežavałasia.
Napiaredadni na terytoryi Parku vysokich technałohij źjaviŭsia zialony namiot z nadpisami «Nado!». U namiocie źbirali podpisy za Łukašenku.
Jak paviedamlaje BiełTA, zboram podpisaŭ sprava nie abmiežavałasia. Rezidenty Parku vysokich technałohij pieraličyli hrošy na vybarčy rachunak Łukašenki.
DziaržSMI nie nazvali kampanii, jakija pieraviali hrošy na rachunak. Z zakanadaŭstva viadoma, što adna arhanizacyja moža achviaravać nie bolš za 60 bazavych, heta značyć nie bolš za 2400 rubloŭ. Pretendent z asabistych srodkaŭ nie moža achviaravać na kampaniju bolš za 10 tysiač bazavych — 400 tysiač rubloŭ. Tracić hetyja hrošy možna na patreby kampanii: zarpłaty členam kamandy, ahitacyjnyja materyjały, arendu załaŭ i hetak dalej.
Kožny pretendent na pasadu prezidenta maje prava adkryć adzin vybarčy rachunak dla farmiravańnia svajho fondu. Adnak umovy davoli strohija — heta tyčycca pierš za ŭsio tych, chto choča pieraličyć tudy hrošy.
Abmiežavańniaŭ šmat. Pretendentam zabaroniena atrymlivać achviaravańni ad zamiežnych dziaržaŭ i arhanizacyj, zamiežnych hramadzian i asob biez hramadzianstva, arhanizacyj, zasnavalnikami, udzielnikami abo ŭłaśnikami majomaści jakich źjaŭlajucca zamiežnyja dziaržavy, arhanizacyi, mižnarodnyja arhanizacyi, a taksama zamiežnyja hramadzianie abo asoby biez hramadzianstva.
Taksama nielha atrymlivać hrošy na vybary ad arhanizacyj, jakija atrymlivali dapamohu z-za miažy, u tym liku ad biełarusaŭ, jakija žyli za miažoj bolš za paŭhoda za apošni hod.
Nielha finansavać vybarčyja kampanii dziaržorhanam, relihijnym i dabračynnym arhanizacyjam, arhanizacyjam, jakija finansujucca ź biudžetu, firmam, jakija byli zasnavany mienš čym za hod da achviaravańni, a taksama niepaŭnaletnim hramadzianam i ananimnym achviaradaŭcam.
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary