«Siońnia vybary sapraŭdnyja, a nie jak u 2020-m». Hajdukievič zapeŭnivaje, što nie budzie zdymacca z vybaraŭ
Lidar praŭładnaj Libieralna-demakratyčnaj partyi kaža, što jahonaje źniaćcie ŭ 2020 hodzie — heta inšaje.
Aleh Hajdukievič zapeŭnivaje, što nie źbirajecca iści šlacham Siarhieja Bobrykava i Volhi Čamadanavaj i zdymacca z vybaraŭ.
Lidar ŁDP ličyć, što jahonaja partyja abaviazanaja ŭdzielničać u kampanii, piša Tochka.by.
«Niama takich umoŭ [dla źniaćcia]. Bolš za toje, u 2010 hodzie moj baćka (Siarhiej Hajdukievič — Red.) źniaŭsia z vybaraŭ. I ja jaho nie padtrymaŭ. Ja byŭ prychilnikam udziełu partyi da kanca», — zajaviŭ Hajdukievič-małodšy.
Jon zajaviŭ, što ŁDP nie prapuskała nivodnaj vybarčaj kampanii z 1994 hoda.
«Ja prychilnik taho, kab kožnaja partyja ŭdzielničała ŭ vybarach. Inakš navošta jana patrebna? Partyja — heta baraćba za ŭładu», — kaža Hajdukievič.
Na jahonuju dumku, kali ŭ partyi niama prahramy, kali jana nie zmahajecca za ŭładu, nie pretenduje na niešta, to heta hramadskaje abjadnańnie.
«Tady pieranazavicie partyju ŭ hramadskaje abjadnańnie. «Amatary matylkoŭ», «Amatary žančyn», jak zaŭhodna nazavicie heta hramadskaje abjadnańnie, ale heta nie palityčnaja struktura», — havoryć kiraŭnik ŁDP.
Praŭda, adnu kampaniju, u jakoj partyja Hajdukieviča ŭ vyniku nie ŭdzielničała, pamiatajuć usie. U 2020 hodzie jon źniaŭsia z prezidenckich vybaraŭ na etapie zboru podpisaŭ. Tady jon zaklikaŭ hałasavać za Łukašenku i zajaviŭ, što «nie moža być prastytutkaj». Paśla hetaha Hajdukievič staŭ davieranaj asobaj Łukašenki.
«2020 hod byŭ adzinym, kali ja źniaŭsia z vybaraŭ, bo nam nie vybary zachacieli zrabić, a vajnu ŭ krainie. Nie važnaja była maja prahrama, nie važnyja byli maje pohlady, nie važnaja była palityčnaja partyja. Važna było adno — albo ty vystupaješ za toje, kab zachavać krainu, albo kab jaje źniščyli», — ličyć Hajdukievič.
Pavodle jaho słoŭ, nie było inšaha vybaru, tamu što «albo ty staiš z prezidentam i abaraniaješ krainu, albo, kali ty tam nie staiš, značyć, uskosna vystupaješ za toje, kab jaje złamali».
Ale na hety raz, jak ličyć Hajdukievič, usio zusim pa-inšamu.
«Siońnia vybary sapraŭdnyja, a nie vajna. Siońnia vybary — heta baraćba idej, prahram, a taksama baraćba za budučyniu krainy, jakoj Biełaruś budzie praz 5-10-15 hadoŭ. Tamu treba abaviazkova ŭdzielničać. I nijakich padstaŭ i ŭmoŭ dla majho źniaćcia nie było, niama i nie moža być na hetych vybarach», — kaža kiraŭnik ŁDP.
Hajdukievič, jakoha pryznačyli deputatam Pałaty pradstaŭnikoŭ, nie chavaje svajoj padtrymki Łukašenki i aktyŭna prapahanduje jaho palityku ŭ dziaržaŭnych ŚMI. Dy i ŭvohule, u «sapraŭdnych vybarach», jak ich nazvaŭ Hajdukievič, siahońnia ŭdzielničajuć tolki prychilniki Łukašenki.
Sam Łukašenka nie tak daŭno zajaviŭ, što Hajdukievič, jak i inšyja padkantrolnyja ŭładam pretendenty, iduć na vybary, kab «akružyć jaho fłanhami i abaranić». Samoha Hajdukieviča jon nazvaŭ svaim «hałoŭnym arakułam».
Ciapier čytajuć
Zahinuŭ biełaruski dobraachvotnik Alaksiej Łazaraŭ7
Kamientary