Biznesu addali 10-15% ad dapamohi Jeŭrasajuza Biełarusi — Jahoraŭ adkazvaje na krytyku z boku Łatuški
Pa słovach Paŭła Łatuški, tracina ad vyłučanych Jeŭrasajuzam hrošaj na padtrymku demakratyčnym siłam Biełarusi iduć na padtrymku rełakavanaha biznesu. Maŭlaŭ, praz heta brakuje hrošaj na palitviaźniaŭ i kulturu. U tym, što tak adbyvajecca, Łatuška vinavacić Andreja Jahorava. Voś, što na hetyja abvinavačvańni adkazaŭ sam Jahoraŭ u piśmovym adkazie «Našaj Nivie».
Jeŭrasajuz vydzieliŭ 30 miljonaŭ jeŭra dapamohi demakratyčnym siłam Biełarusi.
«Budu ščyrym, (…) my nie viedajem — ni Kabiniet, ni Ofis Cichanoŭskaj, (…) ni Kaardynacyjnaja rada, — jakim čynam raźmiarkoŭvajucca hetyja hrošy, — skazaŭ siońnia Pavieł Łatuška ŭ intervju prahramie «Obyčnoje utro».
Jość pryjarytetnyja kirunki. I raniej za heta adkazvaŭ [tahačasny śpikier Kaardynacyjnaj rady] Andrej Jahoraŭ, jaho hrupa. Voś hety hod my jedziem pa šabłonach Jahorava. Jon hetu temu vioŭ, jon byŭ lidaram. Tak skłałasia. Kaliści heta było rašeńnie Ofisa. Jeŭrasajuzu heta padabałasia.
Tamu Jahoraŭ akreślivaŭ hałoŭnyja kirunki razam z arhanizacyjami, hramadzianskimi inicyjatyvami Biełarusi. Adrazu kažu, što nie z palityčnymi strukturami. My ŭvohule nie zaprašalisia dla vypracoŭki rašeńnia. (…)
Zaraz my chočam źmianić hety padychod, prymać udzieł u pryniaćci hetych rašeńniaŭ. Bo, naprykład, 33% išło, nakolki ja viedaju, na padtrymku biznesu, jaki rełakavaŭsia. A brakavała srodkaŭ na palitviaźniaŭ. (…)
Ja nie suprać biznesu, ale ŭ nas jość nacyjanalnaja kultura. Źjechali tysiačy dziejačaŭ nacyjanalnaj kultury, i my navat nie možam prafinansavać kupałaŭcam pastanoŭku śpiektakla», — skazaŭ Łatuška.
«Takija zajavy pakazvajuć poŭnuju niekampietentnaść Paŭła Łatuški ŭ hetym pytańni, — napisaŭ u piśmovym adkazie na zapyt «Našaj Nivy» Andrej Jahoraŭ.
Kaniečnie, ja nie byŭ i nie moh być adkaznym za raźmierkavańnie srodkaŭ Jeŭrasajuza. Srodki raźmiarkoŭvaje sam ES, i inakš być nie moža. Demakratyčnyja siły i hramadzianskaja supolnaść Biełarusi arhanizujuć štohadovyja kansultacyi pa acency patrebaŭ, jakija ES prymaje da ŭvahi, kali prymaje rašeńni pra dapamohu. Heta, kali chočacie, daradčy hołas. I vielmi važna, što my jaho majem», — adznačyŭ palityk.
Kolki ž hrošaj išło na padtrymku biznesu?
Sa słoŭ Jahorava składana dakładna skazać, kolki mienavita hrošaj vydatkoŭvałasia na biznes z 2020 hoda, bo źviestki pa siektarach z pryčyn biaśpieki Jeŭrasajuzam adkryta nie publikujucca.
Pry hetym jon adznačaje, što heta dakładna značna mienš, čym vydzialajecca na padtrymku palitźniavolenych ci na padtrymku adukacyi dla biełaruskich studentaŭ.
«Pa prybliznych acenkach heta moža składać ad 10% da 15%. Dakładniej pra heta musić viedać AVVA jak śpiecyjalnaja struktura, što padtrymlivaje biznes u rełakacyi», — kaža były śpikier Kaardynacyjnaj rady Biełarusi.
Łatuška ničoha nie viedaŭ?
Taksama Jahoraŭ śćviarždaje, što heta niapraŭda, što Łatuška i jahonyja struktury nie byli datyčnyja da vypracoŭki rašeńniaŭ.
«Praces kansultacyj kaardynavaŭsia Ofisam Śviatłany Cichanoŭskaj, Abjadnanym pierachodnym kabinietam i Kaardynacyjnaj radaj i padtrymlivaŭsia ŭsimi.
Usie siektaralnyja dakumienty, što vypracoŭvalisia hrupami, pramiežkavyja i kančatkovyja vynikovyja dakumienty byli dastupnyja ŭsim hetym strukturam. Naturalna, što Łatuška jak namieśnik kiraŭnika Kabinieta mieŭ mahčymaść usie bačyć i kamientavać».
Sioleta, pa słovach Jahorava, hety praces arhanizavany takim samym čynam, jak i raniej.
«Hałoŭnuju rolu hrajuć hrupy, što pradstaŭlajuć arhanizacyi i ekśpiertaŭ z kankretnych siektaraŭ: miedyja, pravy čałavieka, adukacyja, kultura, biznes, hramadzianskaja supolnaść. Jany vypracoŭvajuć asnoŭny źmiest, aceńvajuć ahulny abjom patrebaŭ. Praces kaardynujuć usio tyja ž struktury — OSC, APK, KR, ad kožnaj ź ich jeść svoj pradstaŭnik.
Ja taksama dałučany da pracy jak kaardynatar pa techničnaj i mietadyčnaj častcy kansultacyj», — kaža Jahoraŭ.
«Naša Niva» — bastyjon biełaruščyny
PADTRYMAĆ
Kamientary
Struktury Cichanoŭskaj kaardynujuć usie vydzielenyja hrošy.
Trochnohi vaśminoh, jaki nakryŭ saboj usiu finansavuju dapamohu, vyłučanuju Jeŭrasajuzam na padtrymku demakratyčnym siłam.