Źjavilisia padrabiaznaści zabojstva rasijskaha hienierała ŭ centry Maskvy

Na Razanskim praśpiekcie ŭ Maskvie Kiryłaŭ pražyvaŭ z žonkaj. Pa infarmacyi kanała, dvoje jaho synoŭ navučajucca ŭ Kastramie, dzie ŭ svoj čas ich baćka ŭznačalvaŭ profilnuju Akademiju radyjacyjnaj, chimičnaj i bijałahičnaj abarony.

Žonka Kiryłava ŭžo dała pieršyja pakazańni. Pavodle infarmacyi kanała «VČK-OHPU», žančyna raskazała, što prasiła muža zabiaśpiečyć siabie achovaj u suviazi z vajnoj i «aktyŭnaj pazicyjaj hienierała ŭ ŚMI».

@nashaniva U Maskvie padarvali važnaha hienierała #rośsija #moskva #hienierał #vojsko #armija #słužba #putin #ukraina #kijev #vsu #zsu #sbu #novosti #politika ♬ Suspense - Gold-Tiger

Adnak muž «tolki admachnuŭsia» ad jaje, maŭlaŭ, usiudy jaho supravadžajuć dvoje: adjutant Illa Palikarpaŭ i kiroŭca Andrej Halaniščaŭ. Abodva pryjechali sustrakać Ihara Kiryłava 17 śniežnia ranicaj.

Andrej Halaniščaŭ, pavodle «VČK-OHPU» ŭ momant vybuchu znachodziŭsia ŭ mašynie kala padjezda. Jon nibyta skardziŭsia na toje, što spaŭ usiaho tolki 3 hadziny.

Pavialičyć

«Taki karotki pramiežak pamiž źmienami ŭtvaryŭsia praz toje, što napiaredadni ŭviečary hienierał pozna skončyŭ pracu, słužbovaja «Kamry» pad kiravańniem Andreja dastaviła jaho dadomu paśla 21:00. Śledam kiroŭca advioz dadomu Illu Palikarpava, zavioz aŭtamabil na viedamasnuju aŭtabazu i ŭžo na svajoj mašynie pajechaŭ dadomu. Toj ža šlach, ale ŭ zvarotnym paradku, jamu daviałosia paŭtaryć siońnia ranicaj», — piša telehram-kanał. 

Andrej Halaniščaŭ byŭ zamacavany za hienierałam jak asabisty kiroŭca i vaziŭ Kiryłava ź viasny hetaha hoda, dadaje «VČK-OHPU».

Pa słovach kiroŭcy, za ŭvieś hety čas ich maršrut ni razu nie źmianiŭsia.

«Z apoviedu Andreja vynikaje, što jon zajechaŭ u dvor u 06:05. «Chvasta» za mašynaj nie było, jakich-niebudź pieraškod u elektronicy taksama. Kali pačuŭsia vybuch, spracavali paduški biaśpieki, i jon byŭ u šoku. Jašče znachodziačysia ŭ sałonie, jon patelefanavaŭ u 112 i dziažurnamu ŭ aŭtakałonu. Ni hienierał, ni adjutant nie padavali prykmiet žyćcia. Samakat byŭ adkinuty vybuchnoj chvalaj, nad im nie było ni dymu, ni ahniu. Pieršaj uniz vybiehła žonka Ihara Kiryłava, jana taksama znachodziłasia ŭ šokavym stanie», — piša telehram-kanał.

Pavodle «VČK-OHPU», Andrej Halaniščaŭ nie źviarnuŭ uvahi na nieznajomca, jaki niekatory čas da vychadu hienierała kuryŭ la padjezda. A taksama nie bačyŭ zaviedzienuju mašynu, jakaja stajała niepadalok, jakuju taksama pakul nie znajšli.

Ihar Kiryłaŭ i jaho pamočnik byli zabity vybucham siońnia ŭ Maskvie. Vybuch razdaŭsia, kali mužčyny vychodzili z padjezda. Imavierna, vybuchoŭka była ŭ samakacie, jaki stajaŭ kala doma.

Ukrainski bok aficyjna nie kamientavaŭ heta, ale šmat jakija ŚMI apublikavali adnolkavyja paviedamleńni sa spasyłkaj na krynicy, što za napadam na rasijskaha hienierała staić SBU. 

Kiryłaŭ tam nazvany «całkam zakonnaj cellu». «Kiryłaŭ — vajskovy złačyniec i absalutna zakonnaja cel, pakolki jon zahadaŭ užyć zabaronienuju chimičnuju zbroju suprać ukrainskich vajskoŭcaŭ. Taki haniebny kaniec čakaje ŭsich, chto zabivaje ŭkraincaŭ. Adpłata za vajennyja złačynstvy niepaźbiežna», — padkreślili krynicy ŭ SBU.

SBU ŭčora apublikavała ŭ telehram-kanale padazreńnie Iharu Kiryłavu. Śćviardžajecca, što jon adkazny za prymianieńnie chimzbroi suprać USU na ŭschodnim i paŭdniovym frantach Ukrainy.

Kiryłaŭ viadomy tym, što abvinavačvaŭ ZŠA ŭ stvareńni bajavych kamaroŭ dla Ukrainy: jon raspaviadaŭ ab bijałabaratoryjach va Ukrainie, stvoranych ZŠA, jakija vyvučali virusy, zdolnyja pieradavacca praz kamaroŭ. Taksama jon kazaŭ ab płanach ZŠA dastaŭlać kamaroŭ z dapamohaj bieśpiłotnikaŭ, kab zaražać vajskoŭcaŭ praciŭnika. Jon ža tłumačyŭ rost zachvorvańnia ptušynym hrypam u Rasii mihracyjaj zaražanych ptušak z Ukrainy.

Siońnia ŭ Kiryłava pavinien byŭ być čarhovy bryfinh Minabarony, piša kanał 112.

• 64
• 1
• 4
• 0
• 1
• 1
• 0
• 0