Situacyja z naftapravodam «Družba»: biełaruskija NPZ pracujuć na raniejšaj syravinie
Z čaćviarha, 19 śniežnia, transparciroŭka nafty pa trubapravodzie «Družba» prypyniena pa techničnych pryčynach. Spačatku pra heta paviedamiła ahienctva Reuters, paźniej infarmacyju paćvierdziŭ «Biełnaftachim» u kamientary BiełTA.
Ciapier abodva biełaruskija NPZ praciahvajuć pracu za košt stvoranych zapasaŭ. U «Biełnaftachimie» adznačyli, što zabiaśpiečvajuć adhruzki naftapraduktaŭ u poŭnym abjomie jak na ŭnutrany rynak, tak i na ekspart.
Z Rasii nafta pa «Družbie» pastupaje taksama ŭ Vienhryju, Słavakiju i Čechiju. Rasijskaja syravina źjaŭlajecca asnoŭnaj dla zavoda MOL u Vienhryi. Tam, jak piša Forbes.ua, raźličvajuć, što pastaŭki adnoviacca na praciahu niekalkich dzion. Ciapier jeŭrapiejskija zavody taksama pracujuć za košt stvoranych zapasaŭ.
Raniej, 2 śniežnia, u Polščy paviedamili pra ŭciečku na naftapravodzie «Družba». 4 śniežnia Čechija zajaviła, što spyniła atrymlivać naftu pa trubapravodzie, adnak u «Transnafcie» zapeŭnili, što ŭsie pastaŭki adbyvajucca ŭ štatnym režymie.
Naftapravod «Družba» pačynajecca ŭ Samarskaj vobłaści i dachodzić da administracyjnaj miažy ź Biełaruśsiu, dzie ŭ Branskaj vobłaści padzialajecca na dźvie nitki — paŭnočnuju i paŭdniovuju. Paŭnočnaja prachodzić praź Biełaruś u Polšču i Hiermaniju, a pa paŭdniovaj nafta idzie praź Biełaruś (Mazyr) va Ukrainu (Brody) i dalej u Vienhryju, Słavakiju i Čechiju.
Ciapier čytajuć
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi55
Kamientary