Padobna, što dla takoha aŭto — choć i va ŭzroście — heta sapraŭdy niadoraha.
Na prodaž vystavili Bentley Continental Flying Spur. Pad kapotam u jaho ruchavik abjomam 6 litraŭ ź dźviuma turbinami, jaki raźvivaje mahutnaść u 560 konskich sił. Z takim matoram hety 2,5-tonny siedan, kali byŭ novym, razhaniaŭsia da sotni za 4,9 siekundy. Maksimalnaja chutkaść — 314 km/h.
Zajaŭleny prabieh — 188 tysiač kiłamietraŭ.
U mašyny šykoŭny skurany sałon piasočnaha koleru. Kresły majuć nie tolki funkcyi padahrevu i vientylacyi, ale i masažu. Panel, tarpieda i dźviarnyja karty taksama całkam abciahnutyja skuraj.
U sałonie šmat elemientaŭ z dreva.
Pradaviec zapeŭnivaje, što ŭ mašynie ŭsie funkcyi dahetul pracujuć. Razam z mašynaj iduć dva kamplekty pakryšak dyjamietram na 19 i 20 calaŭ.
U 2006 hodzie ceny na takija aŭto pačynalisia z 165 tysiač dalaraŭ. I kali 19 hadoŭ tamu dazvolić sabie nabyć takuju mašynu mahli tolki vielmi zamožnyja ludzi, to ciapier jana dastupnaja šyrokamu kołu ludziej.
Za mašynu prosiać usiaho 14 tysiač dalaraŭ, što paraŭnalna z canoj na novuju «Łada Viesta» abo piacihadovy Ford Focus, pryviezieny ź Jeŭropy.
Ale achvotnym nabyć takoje aŭto varta razumieć, što kupić takuju mašynu i mieć mahčymaść jaje potym utrymlivać — heta roznyja rečy.
Ramont i absłuhoŭvańnie padobnych mašyn kaštuje nieprystojna šmat, dy i paliva spažyvaje aŭto nie mała.
Admietna, što pradaviec u apisańni paznačyŭ, što prosić za svoj Bentley na 8 tysiač dalaraŭ mienš za rynkavy košt. U Biełarusi ŭsiaho ŭ prodažy dva takich aŭto i za druhi prosiać 22 tysiačy dalaraŭ.
Ale padobna da taho, što hetaja mašyna sapraŭdy pradajecca za niadoraha. Na niamieckim modile.de ceny na Bentley Continental Flying Spur pačynajucca z 18 900 jeŭra, a na rasijskim auto.ru z 1 750 000 rasijskich rubloŭ, što składaje kala 18 tysiač dalaraŭ.
Bentley Continental Flying Spur pieršaha pakaleńnia vypuskaŭsia z 2005 pa 2013 hod.
Kamientary