Dziaŭčyna rašyłasia na apieracyju pa źmienie prykusu. Voś kolki kaštavała pryhožaja i zdarovaja ŭśmieška
Biełaruska raskazała ŭ tyktoku pra svoj šlach da pravilnaha prykusu. Nazvała jana i ceny — takoje sabie dazvolić nie kožny.
Vieranika pačała pracavać nad źmienaj prykusu jašče ŭ 2021 hodzie. Spačatku, raskazvaje dziaŭčyna ŭ tyktoku, jana naviedała prykładna 10 kansultacyj u śpiecyjalistaŭ, što kaštavała joj kala $75. U 2022-m pastaviła brekiety ($1275 plus $50 za padrychtoŭku da ŭstanoŭki).
Z 2022 da 2024 hoda Vieranika nasiła brekiety. Raz na dva miesiacy joj treba było ich karektavać, heta kaštavała $100, ahułam na karekcyju jana vydatkavała $750. Ciaham hetych dvuch hadoŭ davodziłasia lačyć karyjes i vydalić zub, jaki niemahčyma było adnavić — u sumie dziaŭčyna addała za heta kala $210. Taksama jana piać razoŭ rabiła pracedury pa prafiesijnaj hihijenie zuboŭ — jašče minus $230.
I heta tolki kvietački, bo ŭ 2024-m Vieranika stała rychtavacca da apieracyi pa źmienie prykusu. 3D-płanavańnie apieracyi kaštavała joj $3235, a sama skivična-tvaravaja apieracyi na abiedźvie skivicy abyšłasia ŭ $4275 razam z raschodnymi materyjałami. I, jak papiaredžvaje Vieranika, heta jašče nie kančatkovaja suma, bo praces źmieny prykusu doŭhi. Ale dziaŭčyna razhladaje jaho jak uniosak u zdaroŭje, za jaki jana budzie sabie ŭdziačnaja paźniej.
Za što takija hrošy? Apieracyju, pra jakuju idzie havorka, Vieranicy zrabili ŭ listapadzie 2024-ha. Dziaŭčynie raskryli dziosny i na nižniaj, i na vierchniaj skivicy, i adrezali kavałki kostak, to-bok pakaracili abiedźvie skivicy. Usio doŭžyłasia šeść hadzin.
Adnaŭleńnie ad takoj apieracyi zajmaje ad niekalkich miesiacaŭ da pary hadoŭ. Pieršy čas Vieranika mahła tolki pić vadkaści i jeści krem-supy — apošnija možna było spažyvać tolki z dapamohaj šprycu.
Ciapier prajšło ŭžo dva miesiacy, i dziaŭčyna adčuvaje siabie lepiej:
«U mianie ŭžo napałovu viarnułasia adčuvalnaść. Prablemy z charčavańniem pakul što całkam nie adnavilisia — ja jem miakkuju ježu i pažadana tuju, jakuju nie treba pieražoŭvać».
U rot staviać śpiecyjalnyja humki, kab zafiksavać pałažeńnie skivicy, taksama častkova zachoŭvajecca aciok. Niahledziačy na takoje doŭhaje adnaŭleńnie, vynikami apieracyi dziaŭčyna zadavolenaja.
Za apošnija čatyry hady Vieranika vydatkavała na prablemy z prykusam bolš za $10 tysiač.
Adna z kamientatarak namiaknuła, što hetyja hrošy dziaŭčynie dali baćki: «Nie va ŭsich baćkoŭ jość $8 tysiač volnych. Vy zarobki prostych ludziej bačyli?»
Ale Vieranika zarabiła na apieracyju sama:
«Ja taksama prosty čałaviek. Voś u mianie jość prablema — ja znajšła sabie pracu, ja vyłučyła na heta finansy, ja ich adkłała i ciapier vyrašaju prablemu».
«Naša Niva» — bastyjon biełaruščyny
PADTRYMAĆ
Kamientary