Bolš za 20 čałaviek zahinuli na poŭdni Ispanii ŭ čyhunačnaj katastrofie

Krušeńnie ciahnikoŭ adbyłosia ŭ 19:45 niadzieli pa miascovym časie niedaloka ad horada Adamus u Andałusii, na poŭdni Ispanii.

Vysokachutkasny pasažyrski ciahnik kampanii Iryo, jaki nakiroŭvaŭsia z Małahi ŭ Madryd, syšoŭ z rejek i vyjechaŭ na susiednija rejki, paviedamiła kampanija-apieratar čyhunačnaj sietki Ispanii Adif. Paśla hetaha sastaŭ sutyknuŭsia z sustrečnym ciahnikom, jaki ruchaŭsia z Madryda ŭ Uelvu.

Dakładnaja kolkaść paciarpiełych nie nazyvajecca, adnak, pavodle źviestak ministra transpartu Ispanii Oskara Puente, u balnicach znachodziacca bolš za 30 čałaviek z surjoznymi traŭmami.

Pavodle danych słužby ekstrannaj dapamohi Andałusii, u vyniku sutyknieńnia paciarpieli nie mienš za 73 čałavieki.

Ahulnaja kolkaść paciarpiełych moža być bolšaj: jašče niekalki čałaviek mohuć być zabłakavanyja ŭ vahonach, papiaredzili vyratavalniki.

Pavodle słoŭ Puente, jakija pryvodzić vydańnie El Pais, krušeńnie vyhladaje «krajnie dziŭnym», pakolki ciahnik syšoŭ z rejek na pramym učastku puci, jaki byŭ adramantavany ŭ mai minułaha hoda; vydatki na ramont skłali kala 700 młn jeŭra. Sam ciahnik taksama byŭ praktyčna novy, dadaŭ Puente.

Aficyjnaja pryčyna pakul nieviadomaja. Rasśledavańnie viadzie śpiecyjalnaja hrupa ekśpiertaŭ, sfarmiravanaja pad ehidaj kamisii pa rasśledavańni čyhunačnych avaryj. Pakul ekśpierty vykazali tolki «ździŭleńnie» adnosna patencyjnych pryčyn avaryi, cytuje El Pais ministra transpartu. Čakajecca, što rasśledavańnie, jakoje pavinna ŭstanavić, što adbyłosia, praciahniecca nie mienš za miesiac.

Adzin z pasažyraŭ pieršaha ciahnika raspavioŭ žurnalistam, što ŭdar byŭ takoj siły, što byŭ padobny na ziemlatrus, cytuje jaho apovied AFP. Paśla sutyknieńnia jamu padałosia, što ciahnik voś-voś pieravierniecca, paśla čaho vahon, u jakim jon znachodziŭsia, sapraŭdy ŭpaŭ na bok.

U pieršym ciahniku, jaki syšoŭ z rejek, znachodziłasia kala 300 pasažyraŭ, paviedamiła kampanija Iryo, što ažyćciaŭlaje pieravozki pa hetym maršrucie. U druhim, sustrečnym, ciahniku, jaki naležyć kampanii Alvio, mahli znachodzicca kala 100 pasažyraŭ.

Pavodle słoŭ pradstaŭnika italjanskaj čyhunačnaj kampanii Ferrovie dello Stato (joj naležyć pieršy ciahnik), u avaryi ŭdzielničaŭ ciahnik Freccia 1000, jaki moža raźvivać maksimalnuju chutkaść 400 km/h, piša Reuters. Druhi ciahnik u momant sutyknieńnia moh ruchacca sa chutkaściu kala 200 km/h, piša El Pais.

Adzin z zahinułych — mašynist druhoha ciahnika, paviedamlajuć ispanskija ŚMI.

Ahienctva pa nadzvyčajnych situacyjach Andałusii zaklikała ŭsich pasažyraŭ ciahnikoŭ, jakija patrapili ŭ avaryju, paviedamić u sacyjalnych sietkach, što jany žyvyja.

Paśla avaryi ŭsie čyhunačnyja znosiny pamiž Madrydam i Andałusijaj byli prypynienyja. 

Pavodle słoŭ vyratavalnikaŭ, pry krušeńni niekatoryja vahony nie tolki pierakulilisia, ale i defarmavalisia. Heta ŭskładniaje vyratavalnyja raboty i vymańnie cieł zahinułych. Jak raspavioŭ načalnik pažarnaj słužby Kardovy Fransiska Karmona ispanskamu hramadskamu viaščalniku RTVE, «nam pryjšłosia dastavać spačatku cieła zahinułaha, kab dabracca da žyvoha čałavieka. Heta ciažkaja i składanaja praca».

Pavodle słoŭ mužčyny, jaki znachodziŭsia ŭ adnym ź ciahnikoŭ, mnohija pasažyry atrymali ranieńni askołkami škła. Inšyja pasažyry raspaviali žurnalistam, što im pryjšłosia samim bić śpiecyjalnym małatočkam škło ŭ voknach, kab vybracca z defarmavanych vahonaŭ.

Premjer-ministr Ispanii Piedra Sančes zajaviŭ, što kraina pieražyvie «noč hłybokaha smutku».

• 0
• 0
• 0
• 1
• 3
• 5
• 1
• 0